സബ് പ്രൈം പ്രതിസന്ധിയില്‍ ഐസിഐസിഐ ബാങ്കിനും കൈപൊള്ളി

ദില്ലി: യുഎസിലെ സബ് പ്രൈം വായ്പാ പ്രതിസന്ധിയുടെ അലകള്‍ ഇന്ത്യയിലേക്കും പടരുന്നു. സബ് പ്രൈം വായ്പാ പ്രതിസന്ധി മൂലം ഇന്ത്യയിലെ ഏറ്റവും വലിയ സ്വകാര്യ ബാങ്കായ ഐസിഐസിഐ ബാങ്കിന് കൈപൊള്ളി.

പാര്‍ലമെന്റില്‍ ധനകാര്യ സഹമന്ത്രി പവന്‍കുമാര്‍ ബന്‍സാലിയാണ് ഇക്കാര്യം വെളിപ്പെടുത്തിയത്. ആദ്യമായാണ് യുഎസിലെ സബ് പ്രൈം വായ്പാ പ്രതിസന്ധി മൂലം നഷ്ടമുണ്ടായതായി ഒരു ഇന്ത്യന്‍ ബാങ്ക് വെളിപ്പെടുത്തുന്നത്.

അന്തര്‍ദേശീയ വിപണിയില്‍ ഐസിഐസിഐ വാങ്ങിയ സെക്യൂരിറ്റികളുടെ മൂല്യം കുറ‍ഞ്ഞതാണ് ബാങ്കിന് നഷ്ടം വരുത്തിയത്. ബാങ്ക് ഇതുവരെ ഈ സെക്യൂരിറ്റികള്‍ വിറ്റിട്ടില്ല. ഐസിഐസിഐക്കു പിന്നാലെ മറ്റു ബാങ്കുകളും ഇത്തരത്തിലുണ്ടായ നഷ്ടത്തെ കുറിച്ച് വരും ദിവസങ്ങളില്‍ വെളിപ്പെടുത്തുമെന്നാണ് കരുതുന്നത്.

സബ് പ്രൈം പ്രതിസന്ധി മൂലം യുഎസ് ബാങ്കുകളായ സിറ്റി ബാങ്ക്, മെറില്‍ ലിഞ്ച്, ഡോഷെ ബാങ്ക് എന്നിവയ്ക്ക് 18,000 കോടി ഡോളറിന്റെ നഷ്ടമാണുണ്ടായത്.