വിവാഹത്തിന്‌ അവര്‍ഡ്‌ നേടി; വിവാഹത്തട്ടിപ്പ്‌ നടത്തി ജയിലിലായി

നാഗ്‌പൂര്‍: സ്‌ത്രീധനം വാങ്ങാതെ വിവാഹിതനായതിന്‌ രണ്ടുവട്ടം പുരസ്‌കാരങ്ങള്‍ നേടിയയാളെ കോടതി തടവുശിക്ഷയ്‌ക്ക്‌ വിധിച്ചു.

വിവാഹത്തട്ടിപ്പ്‌ നടത്തിയതിനാണ്‌ വിജയ്‌ നാരായണ്‍ ജാദവ്‌ എന്നയാളെ വിചാരണക്കോടതി മൂന്നു വര്‍ഷത്തെ കഠിനതടവിന്‌ ശിക്ഷിക്കുകയും 20000രൂപ പിഴയൊടുക്കാന്‍ നിര്‍ദ്ദേശിക്കുകയും ചെയ്‌തത്‌. ജാദവിനൊപ്പം കുറ്റം ചുമത്തപ്പെട്ട മതാപിതാക്കളെയും ആദ്യഭാര്യയെയും കോടതി വെറുതെ വിട്ടു.

2002 ജൂണില്‍ ഔറംഗബാദ്‌ സ്വദേശിനിയായ കവിത ചവാനെ ജാദവ്‌ കോടതിയംഗീകാരത്തോടെയാണ്‌ വിവാഹം ചെയ്‌തത്‌. ഈ വിവാഹത്തിന്‌ സ്‌ത്രീധനം വാങ്ങാത്തതിന്റെ പേരില്‍ ജാദവിന്‌ അവര്‍ഡും ലഭിച്ചു.

പിന്നീട്‌ 2003 ഫെബ്രുവരിയില്‍ ബുല്‍ധാന സ്വദേശിനിയായ സീമാ പ്രഹ്ലാദ്‌ ഷെര്യയ എന്ന യുവതിയെയും കോടിയംഗീകാരത്തോടെ ഇയാള്‍ വിവാഹം കഴിച്ചു. ഇത്‌ മിശ്രവിവാഹമായിരുന്നതിനാല്‍ അതിനുള്ള അവാര്‍ഡും ജാദവിന്‌ ലഭിച്ചു.

നേരത്തേ വിവാഹിതനായ കാര്യം മറച്ചുവച്ചാണ്‌ സീമയെ ഇയാള്‍ വിവാഹം ചെയ്‌തത്‌. വിവാഹം കഴിഞ്ഞ്‌ അധികനാള്‍ കഴിയുന്നതിന്‌ മുമ്പ്‌ ജാദവിന്റെ മാതാപിതാക്കള്‍ സ്‌ത്രീധനം ആവശ്യപ്പെട്ട്‌ സീമയെ പീഡിപ്പിക്കാന്‍ തുടങ്ങി. സീമയുടെ അക്കൗണ്ടില്‍ നിന്നും 30,000 രൂപ പിന്‍വലിച്ചതിന്‌ശേഷമായിരുന്നു പീഡനം.

പിന്നീട്‌ ജാദവിന്റെ ആദ്യവിവാഹത്തെക്കുറിച്ച്‌ അറിഞ്ഞപ്പോഴാണ്‌ സീമ ഭര്‍ത്താവ്‌ തന്നെ വഞ്ചിച്ചകാര്യം പൊലീസില്‍ അറിയിച്ചത്‌.