കാര്‍ത്തിക തിരുനാള്‍ ലക്ഷ്‌മിഭായി തമ്പുരാട്ടി അന്തരിച്ചു

തിരുവനന്തപുരം: തിരുവിതാംകൂര്‍ രാജകുടുംബത്തിലെ മുതിര്‍ന്ന അംഗമായ കാര്‍ത്തിക തിരുനാള്‍ ലക്ഷ്‌മിഭായി തമ്പുരാട്ടി (92) അന്തരിച്ചു.

ഞായറാഴ്‌ച രാവിലെ തിരുവനന്തപുരം ശ്രീചിത്തിര തിരുന്നാള്‍ ആശുപത്രിയിലായിരുന്നു അന്ത്യം. സംസ്‌ക്കാരം ഉച്ചയ്‌ക്ക്‌ മൂന്നിന്‌ ഔദ്യോഗിക ബഹുമതികളോടെ കവടിയാര്‍ കൊട്ടാര വളിപ്പില്‍ നടക്കും.

മഹാറാണി സേതുപാര്‍വതി ഭായിയുടെയും കിളിമാനൂര്‍ കൊട്ടാരത്തിലെ രവി വര്‍മ കോയി തമ്പുരാന്റെയും മകളായി 1916ന്‌ സെപ്‌റ്റംബര്‍ 17നാണ്‌ ലക്ഷമിഭായി തമ്പുരാട്ടിയുടെ ജനനം.

തിരുവിതാംകൂറിന്റെ അവസാന നാടുവാഴിയായിരുന്ന ശ്രീ ചിത്തിര തിരുനാള്‍ ബാലരാമ വര്‍മ്മയുടെയും ഇപ്പോള്‍ രാജ പദവി വഹിയ്‌ക്കുന്ന ഉത്രാടം തിരുനാള്‍ മാര്‍ത്താണ്ഡ വര്‍മ്മയുടെയും സഹോദരിയാണ്‌.

പൂഞ്ഞാര്‍ കൊട്ടാരത്തിലെ ഗോദവര്‍മ രാജ 1934ല്‍ തമ്പുരാട്ടിയെ വിവാഹം കഴിച്ചത്‌. ഗോദവര്‍മ 27 വര്‍ഷം മുമ്പ്‌ അന്തരിച്ചിരുന്നു.

പൂയം തിരുനാള്‍ ഗൗരി പാര്‍വതി ഭായി, അശ്വതി തിരുനാള്‍, ഗൗരി ലക്ഷ്‌മി ഭായി, മൂലം തിരുനാള്‍ രാമവര്‍മ്മ എന്നിവരാണ്‌ മക്കള്‍.

സ്വാതന്ത്രത്തിനും മുന്നും പിന്നുമുള്ള ഒട്ടേറെ ചരിത്ര മൂഹുത്തങ്ങള്‍ക്ക്‌ സാക്ഷ്യം വഹിച്ചിട്ടുള്ള ലക്ഷ്‌മി ഭായി തമ്പുരാട്ടി ഇംഗ്ലീഷ്‌, ഫ്രഞ്ച്‌, സംസ്‌കൃതം ഭാഷകള്‍ അനായാസമായി കൈകാര്യം ചെയ്യുമായിരുന്നു.