ശ്‌മശാനങ്ങള്‍ നിറയുന്നു; ഇനി സംസ്‌കാരം കടലില്‍

ലണ്ടന്‍: ശ്‌മശാനങ്ങളില്‍ ഒഴിവില്ലാതാവുകയും ശവസംസ്‌കാരം ചെലവേറിയ ഒന്നായി മാറുകയും ചെയ്‌തതോടെ ബ്രിട്ടനില്‍ കടലില്‍ ശവസംസ്‌കാരം നടത്തുന്നത്‌ പതിവാകുന്നു.

കടലിലെ ശവസംസ്‌കാരത്തിന്‌ നാലായിരം പൗണ്ട്‌(294,190.82 രൂപ) ചെലവുവരും. കരയിലെ ശ്‌മശാനങ്ങളിലെ ശവസംസ്‌കാരത്തിനാകട്ടെ ഇതിന്റെ ഇരട്ടി തുകയാണ്‌ ചെലവാകുന്നത്‌.

ബ്രിട്ടീഷ്‌ തീരത്തിനിന്നും അകലെ സ്ഥിതിചെയ്യുന്ന റൈറ്റ്‌ ദ്വീപിനടുത്തും ഈസ്റ്റ്‌ സസ്‌കെസിലെ ന്യൂഹെവനിലുമാണ്‌ കടലില്‍ ശവസംസ്‌കാരം നടത്താന്‍ അനുവദിച്ചിട്ടുള്ളത്‌. 2008ല്‍ മാത്രം പതിനാല്‌ മൃതദേഹങ്ങള്‍ ഇവിടങ്ങളിലായി സംസ്‌കരിച്ചു.

നൂറ്റമ്പതോളം ആളുകള്‍ മരണശേഷം തങ്ങളുടെ ശവസംസ്‌കാരം കടലില്‍ നടത്തുന്നതിനായി മുന്‍കൂര്‍ ബുക്കിങും നടത്തിക്കഴിഞ്ഞു. ചിലര്‍ തങ്ങളുടെ വില്‍പത്രങ്ങളില്‍ കടലില്‍ എവിടെയാണ്‌ തന്റെ മൃതദേഹം കൊണ്ടിടേണ്ടതെന്നും എഴുതിവയ്‌ക്കുന്നുണ്ടത്രേ.

കടലില്‍ ശവസംസ്‌കാരം നടത്തണമെങ്കില്‍ മറൈന്‍ ഫിഷറീസ്‌ എജന്‍സിയുടെ ലൈസന്‍സ്‌ ആവശ്യമാണ്‌. ഇപ്പോള്‍ സംസ്‌കാരത്തിന്‌ അനുമതിയുള്ള രണ്ടിടത്തും ആഴക്കടല്‍ മത്സ്യബന്ധനവും ഡൈവിങും നിരോധിച്ചിട്ടുണ്ട്‌. ഡെവണിലെ ബ്രിട്ടാനിയ ഷിപ്പിങ്‌ കമ്പനി റൈറ്റ്‌ ദ്വീപിന്‌ സമീപം ശവസംസ്‌കാരച്ചടങ്ങിനായി പ്രത്യേക ബോട്ട്‌ സജ്ജമാക്കിയിട്ടുണ്ട്‌.

മൃതശരീരത്തിനൊപ്പം ബന്ധുക്കളെയും കയറ്റി ബോട്ട്‌ കടലില്‍ നിശ്ചിത സ്ഥലത്ത്‌ എത്തും പിന്നീട്‌ ശവപ്പെട്ടി യന്ത്രസഹായത്തോടെ കടലില്‍ താഴ്‌ത്തും.

പ്രതിവര്‍ഷം 6 ലക്ഷത്തോളം പേര്‍ മരിയ്‌ക്കുന്ന ബ്രിട്ടനില്‍ ശവസംസ്‌കാരത്തിന്‌ ശ്‌മശാനങ്ങളില്‍ ഇടം കണ്ടെത്തുകയെന്നത്‌ വളരെ ക്ലേശകരമാണ്‌. അടുത്ത മുപ്പത്‌ വര്‍ഷത്തിനകം ഇവിടത്തെ ശ്‌മശാനങ്ങളെല്ലാം നിറയുമെന്നാണ്‌ കണക്കാക്കിയിരിക്കുന്നത്‌.

ശ്‌മശാനങ്ങളിലെ ശവക്കല്ലറകളില്‍ നിന്നും ശവങ്ങള്‍ പുറത്തെടുത്ത്‌ കൂടുതല്‍ ആഴത്തില്‍ കുഴിച്ചിടാനും അതിന്‌ മീതെ മറ്റു മൃതദേഹങ്ങള്‍ സംസ്‌കരിക്കാനുമുള്ള സൗകര്യങ്ങള്‍ ഏര്‍പ്പെടുത്താന്‍ അധികൃതര്‍ പദ്ധതിയിടുന്നുണ്ട്‌.