മാധ്യമപ്രവര്‍ത്തകര്‍ ബുഷിനെ ചെരുപ്പുകൊണ്ടെറിഞ്ഞു

ബാഗ്‌ദാദ്‌: ഇറാഖ്‌ സന്ദര്‍ശനത്തിനിടെ അമേരിക്കന്‍ പ്രസിഡന്റ്‌ ജോര്‍ജ്‌ ബുഷിനെ മാധ്യമപ്രവര്‍ത്തകന്‍ ചെരുപ്പുകൊണ്ടെറിഞ്ഞു. ഇറാഖ്‌ പ്രധാനമന്ത്രി നൂറി അല്‍മാലികിന്‌ കൈകൊടുക്കവേയാണ്‌ ബുഷിനുനേരെ അപ്രതീക്ഷിത ആക്രമണം ഉണ്ടായത്‌.

നൂറി അല്‍മാലിക്കിയുടെ സ്വകാര്യ ഓഫീസിലാണ്‌ സംഭവം നടന്നത്‌. മാലിക്കിയും ബുഷും ഒന്നിച്ച്‌ മാധ്യമപ്രവര്‍ത്തകരെ അഭിസംബോധന ചെയ്യുകയായിരുന്നു. ഇതിനിടെ ഇറാഖ്‌ യുദ്ധം അവസാനിച്ചിട്ടില്ലെന്ന്‌ ബുഷ്‌ പറഞ്ഞയുടനേയാണ്‌ ചെരുപ്പേറുണ്ടായത്‌.

ബുഷ്‌ യുദ്ധം തീര്‍ന്നിട്ടില്ലെന്ന്‌ പറഞ്ഞപ്പോള്‍ അല്‍-ബാഗ്‌ ദാദിയ എന്ന ചാനലിന്റെ റിപ്പോര്‍ട്ടറായ മുംതാദര്‍ അല്‍ സെയ്‌ദി ചാടിയെണീറ്റ്‌ തന്റെ ഷൂസുകള്‍ ഊരി ബുഷിന്‌ നേരെ എറിയുകയായിരുന്നു. പട്ടീ ഇതാ നിനക്ക്‌ ഇറാഖി ജനതയുടെ യാത്രയയപ്പ്‌ ചുംബനം എന്നാക്രോശിച്ചുകൊണ്ടായിരുന്നു സെയ്‌ദി ആദ്യത്തെ ഷൂ്‌ വലിച്ചെറിഞ്ഞത്‌.

ഇറാഖ്‌ യുദ്ധത്തില്‍ കൊല്ലപ്പെട്ടവര്‍ക്കും വിധവകള്‍ക്കും അനാഥര്‍ക്കും വേണ്ടിയെന്ന്‌ പറഞ്ഞുകൊണ്ടാണ്‌ ഇയാള്‍ രണ്ടാമത്തെ ഷൂ ഏറിഞ്ഞത്‌. സെയ്‌ദി ചെരുപ്പൂരിയെറിഞ്ഞ യുടന്‍ മാലിക്കി ഇടപെട്ടതുകൊണ്ട്‌ ബുഷിന്‌ ഏറ്‌ ഏറ്റില്ല.

തുടര്‍ന്ന്‌ സെയ്‌ദിയെ ഇറാഖി സുരക്ഷാ ഉദ്യോഗസ്ഥര്‍ ബലമായി പിടിച്ച് ‌പുറത്തേയ്‌ക്ക്‌ കൊണ്ടുപോയി. പത്ത്‌ ഇഞ്ച്‌ സൈസുള്ള ഷൂസായിരുന്നു എറിഞ്ഞതെന്ന്‌ മാത്രമാണ്‌ ബുഷ്‌ പ്രതികരിച്ചത്‌. ബുഷ്‌ കുനിഞ്ഞു നിന്നതുകൊണ്ട്‌ ചെരുപ്പേറ്‌ കൊണ്ടില്ലെന്നാണ്‌ വൈറ്റ്‌ ഹൗസ്‌ വൃത്തങ്ങള്‍ പറഞ്ഞത്‌.

അറബി സംസ്‌കാരം അനുസരിച്ച്‌ ചെരുപ്പുകൊണ്ടെറിയുകയെന്നത്‌ ഏറ്റവും നിന്ദ്യമായ കാര്യമായാണ്‌ കരുതപ്പെടുന്നത്‌. 2003ല്‍ ബാഗ്‌ദാദിലെ സദ്ദാം പ്രതിമ തകര്‍ക്കപ്പെട്ടപ്പോള്‍ കണ്ടുനിന്ന പലരും പ്രതിമയുടെ മുഖത്ത്‌ ചെരുപ്പൂരി അടിച്ചിരുന്നു.