ലങ്കന്‍ സേന കിള്ളിനൊച്ചിയില്‍

കൊളംബോ: എല്‍ടിടിഇയുടെ ആസ്ഥാനമായ കിള്ളിനൊച്ചിയിലേക്ക്‌ ശ്രീലങ്കന്‍ സേന പ്രവേശിച്ചതായി റിപ്പോര്‍ട്ട്‌. കഴിഞ്ഞ ഒരു ദശകത്തിനിടെ ഇതാദ്യമായാണ്‌ തമിഴ്‌ പുലികളുടെ ശക്തിദുര്‍ഗ്ഗമായ കിള്ളിനൊച്ചിയിലേക്ക്‌ ശ്രീലങ്കന്‍ സേന പ്രവേശിയ്‌ക്കുന്നത്‌.

കിള്ളിനൊച്ചിയുടെ മൂന്ന്‌ ഭാഗത്തു നിന്നും അക്രമിച്ച സേന കിള്ളിനൊച്ചിയുടെ വടക്കുള്ള പരന്തന്‍ ജംഗ്‌ഷന്റെ പ്രധാന ഭാഗം കീഴടക്കിയതായി മുതിര്‍ന്ന സൈനിക ഉദ്യോഗസ്ഥര്‍ അറിയിച്ചു.

പുലികള്‍ ശക്തമായി ചെറുത്തുനില്‌ക്കുന്നുണ്ടെന്ന്‌ റിപ്പോര്‍ട്ടുകളുണ്ടായിരുന്നെങ്കിലും സേനയുടെ പുതിയ അവകാശവാദത്തോട്‌ അവര്‍ ഇതുവരെ പ്രതികരിച്ചിട്ടില്ല.

തമിഴ്‌ പുലികളുടെ ആസ്ഥാന മന്ദിരം സ്ഥിതി ചെയ്യുന്ന കിള്ളിനൊച്ചി കീഴടക്കാന്‍ മാസങ്ങള്‍ക്ക്‌ മുമ്പേ സൈന്യം തുടങ്ങിയ ശ്രമങ്ങള്‍ ലക്ഷ്യത്തിലേക്കടുക്കുന്നുവെന്നാണ്‌ റിപ്പോര്‍ട്ടുകള്‍. ഇവിടം കീഴടക്കിയാല്‍ എല്‍ടിടിഎയ്‌ക്ക്‌ പിന്നെ അധികകാലം ചെറുത്തുനില്‌ക്കാനാവില്ലെന്നാണ്‌ കരുതപ്പെടുന്നത്‌.

പത്ത്‌ കൊല്ലം മുമ്പാണ്‌ ശ്രീലങ്കന്‍ സേനയെ തുരത്തി കിള്ളിനൊച്ചിയുടെ നിയന്ത്രണം പുലികള്‍ ഏറ്റെടുത്തത്‌. ഇതിന്‌ ശേഷം പട്ടാളത്തിന്‌ ഈ ഭാഗത്തേക്ക്‌ കടക്കാന്‍ പോലും കഴിഞ്ഞിരുന്നില്ല.