ശബരിമലയില് സ്ഫോടനം നടത്തുമെന്ന് ഭീഷണി
പത്തനംതിട്ട: ശബരിമലയില് ബോംബ് സ്ഫോടനം ഉണ്ടാകുമെന്ന് തമിഴ്നാട്ടില് നിന്നും ഭീഷണി. ഭീഷണിയെത്തുടര്ന്ന് ശബരിമലയില് സുരക്ഷാ സംവിധാനങ്ങള് കര്ശനമാക്കി.
ജനുവരി 9ന് മുമ്പ് ബോംബ് സ്ഫോടനം നടത്തുമെന്നാണ് ഭീഷണിയില് പറയുന്നത്. തമിഴ്നാട്ടില് നിന്നെത്തുന്ന തീര്ത്ഥാടകരായ ഒരു പ്രായമായ സ്ത്രീയും പെണ്കുട്ടിയുമായിരിക്കും ദൗത്യം നിര്വ്വഹിക്കുകയെന്നാണ് പറയുന്നത്.
പ്രായമായ സ്ത്രീ സന്നിധാനത്തും പെണ്കുട്ടി മാളികപ്പുറം ക്ഷേത്രത്തിലും ഒരു സമയം കൃത്യം നിര്വ്വഹിക്കുമെന്നും ഭീഷണിയില് വ്യക്തമാക്കുന്നു. ഭീഷണിയെത്തുടര്ന്ന് തമിഴ്നാട് ഐബി ഡയറക്ടറുടെ നേതൃത്വത്തില് വന്പൊലീസ് സംഘം ശബരിമലയിലെത്തി രഹസ്യവിവരം കൈമാറുകയായിരുന്നു.
മുംബൈ ഭീകരാക്രമണത്തിന് ശേഷം പല കോണുകളില് നിന്നും ശബരിമലയ്ക്കെതിരെ ഭീഷണികളുയര്ന്നിരുന്നു. കേരളത്തിന് പുറമേ ആന്ധ്ര, കര്ണാടക, തമിഴ്നാട് സംസ്ഥാനങ്ങളില് നിന്നും കേന്ദ്രത്തില് നിന്നും വിവിധ ഭാഗങ്ങളിലായി കൂടുതല് പൊലീസുകാരെ നിരീക്ഷണത്തിനായി നിയോഗിച്ചിട്ടുണ്ട്.
മകരവിളക്ക് കാലത്ത് ആയിരക്കണക്കിന് തീര്ത്ഥാടകരാണ് ശബരിമലയില് എത്തുക. തീര്ത്ഥാടകര്ക്കൊപ്പം തീവ്രവാദികള് നുഴഞ്ഞുകയറാനുള്ള സാധ്യത ഏറെയാണെന്നാണ് ഇന്റലിജന്സ് വിഭാഗങ്ങള് ചൂണ്ടിക്കാട്ടുന്നത്.