ജില്ലാ ജഡ്‌ജിയെ തെരുവുനായ കടിച്ചു

ചണ്ഡിഗഡ്‌: ജില്ലാ സെഷന്‍സ്‌ ജഡ്‌ജിയെ തെരുവുനായ കടിച്ചു. നായ ശല്യം രൂക്ഷമായ നഗരത്തിലെ സെക്ടര്‍ 24ലെ സനാതം ധര്‍മ ക്ഷേത്രത്തില്‍വച്ചാണ്‌ തിങ്കളാഴ്‌ച ജസ്റ്റിസ്‌ കെകെ ഗാര്‍ഗിന്‌ കടിയേറ്റത്‌.

ഗാര്‍ഗിനെ കടിച്ച്‌ ഏതാനും മണിക്കൂറുകള്‍ക്കുള്ളില്‍ നായ ചത്തത്‌ ആശങ്കയുണ്ടാക്കിയിട്ടുണ്ട്‌. പേപ്പട്ടികളാണ്‌ ഇത്തരത്തില്‍ ചാവുകയെന്നാണ്‌ ഡോക്ടര്‍മാരുടെ നിഗമനം. ഗാര്‍ഗിനെ കടിച്ച നായയ്‌ക്ക്‌ പേയുണ്ടോയെന്ന കാര്യത്തില്‍ വ്യക്തതയില്ല.

ക്ഷേത്രത്തില്‍ വച്ച്‌ ഭക്തര്‍ക്ക്‌ പാലും പ്രസാദവും വിതരണം ചെയ്യുകയായിരുന്നു അദ്ദേഹം, ഇതിനിടെയാണ്‌ തെരുവുനായ അദ്ദേഹത്തിന്റെ കാലില്‍ കടിച്ചത്‌. പെട്ടന്നുതന്നെ കുടുംബാംഗങ്ങള്‍ ഇദ്ദേഹത്തെ സെക്ടര്‍ 16ലുള്ള മള്‍ട്ടി സ്‌പെഷ്യാലിറ്റി ആശുപത്രിയില്‍ എത്തിച്ചു.

അധികൃതരുടെ നിര്‍ദ്ദേശപ്രകാരം പൊലീസ്‌ ഉടന്‍തന്നെ അദ്ദേഹത്തെ കടിച്ച നായയെ പിടികൂടിയെങ്കിലും ഉടന്‍തന്നെ നായ ചാവുകയായിരുന്നു.

നായയ്‌ക്ക്‌ പേവിഷബാധയുണ്ടോയെന്നറിയാന്‍ ജഡം പോസ്‌റ്റ്‌മോര്‍ട്ടം നടത്തിയിട്ടുണ്ട്‌. ഗാര്‍ഗിന് പേവിഷബാധയ്ക്കെതിരെ കുത്തിവയ്പ് നടത്തിയിട്ടുണ്ടെന്നും താമസിയാതെ അദ്ദേഹത്തിന്‌ ആശുപത്രിവിടാമെന്നും ആശുപത്രി വൃത്തങ്ങള്‍ അറിയിച്ചു.