മാനഭംഗം: കന്യാസ്ത്രീ രണ്ടുപേരെ തിരിച്ചറിഞ്ഞു
ഭുവനേശ്വര്: ഒറീസയിലെ കണ്ഡാമലില് വര്ഗീയ കലാപത്തിനിടെ കൂട്ടമാനഭംഗത്തിനിരയായ കന്യാസ്ത്രീ രണ്ടു പ്രതികളെ തിരിച്ചറിഞ്ഞു.
സംഭവം നടന്ന് നാലു മാസങ്ങള്ക്ക് ശേഷം തിങ്കളാഴ്ച കട്ടക്കിലെ ചൗധ്യാര് ജയിലില് നടന്ന തിരിച്ചറിയല് പരേഡിലാണ് കന്യാസ്ത്രീ പ്രതികളെ തിരിച്ചറിഞ്ഞത്. കേസില് ഇതിനകം അറസ്റ്റ് ചെയ്യപ്പെട്ട പത്തു പേരുള്പ്പെടെ 90 പേരെയാണ് തിരിച്ചറിയല് പരേഡില് അണിനിരത്തിയത്.
അറസ്റ്റിലായ പത്തില് നാലു പേരെ ഒന്നര മണിക്കൂറോളം നീണ്ട പരേഡിനിടെ കന്യാസ്ത്രീ ചൂണ്ടിക്കാട്ടി. പിന്നീട് ഇവരില് നിന്നാണ് രണ്ടുപേരെ തിരിച്ചറിഞ്ഞത്.
കട്ടക്ക് സബ് ഡിവിഷണല് ജുഡീഷ്യല് മജിസ്ട്രേട്ട് പി.കെ ദാസ്, ഉന്നത ക്രൈംബ്രാഞ്്ച് ഉദ്യോഗസ്ഥര്, കത്തോലിക്കാ സഭയില്നിന്നുള്ള മൂന്നു വനിതാ പ്രതിനിധികള് എന്നിവര്ക്കൊപ്പമാണ് കന്യാസ്ത്രീ തിരിച്ചറിയില് പരേഡിനെത്തിയത്.
തിരിച്ചറിയില് പരേഡ് ബലിഗുഡയില്വച്ച് നടത്താനായിരുന്നു ആദ്യം തീരുമാനിച്ചത്. എന്നാല് വീണ്ടും കണ്ഡമാലിലേയ്ക്ക് വരാന് കഴിയില്ലെന്ന് കന്യാസ്ത്രീ വ്യക്തമാക്കിയതിനെത്തുടര്ന്നാണ് പരേഡ് ചൗധ്വാര് ജയിലിലേയ്ക്ക് മാറ്റിയത്.
വിഎച്ച്പി നേതാവ് ലക്ഷ്മണാനന്ദ സരസ്വതി കൊല്ലപ്പെട്ടതിനെത്തുടര്ന്നാണ് കണ്ഡമാലില് ക്രൈസ്തവര്ക്കെതിരെ വ്യാപകമായ ആക്രമണം ഉണ്ടായത്.