ജോര്‍ജ്‌ ബുഷിന്റെ അരുമ 'ഇന്ത്യ' ചത്തു

വാഷിങ്‌ടണ്‍: അമേരിക്കന്‍ പ്രസിഡന്റ്‌ ജോര്‍ജ്‌ ബുഷിന്റെ വളര്‍ത്തുപൂച്ചയായ ഇന്ത്യ ചത്തു. ബുഷിന്റെ കുടുംബത്തിനൊപ്പം പതിനെട്ടുവര്‍ഷം സന്തത സഹചാരിയായി ജീവിച്ച പൂച്ചയാണ്‌ ഞായറാഴ്‌ച വൈറ്റ്‌ ഹൗസില്‍ ചത്തത്‌.

പൂച്ചയുടെ മരണവിവരം ചൊവ്വാഴ്‌ചയാണ്‌ വൈറ്റ്‌ ഹൗസ്‌ വൃത്തങ്ങള്‍ പുറത്തുവിട്ടത്‌. പൂച്ചയുടെ വേര്‍പാടില്‍ ബുഷിന്റെ ഭാര്യ ലോറയും മക്കളായ ബാര്‍ബറ, ജന്ന എന്നിവരും കടുത്ത മനോവിഷമത്തിലാണത്രേ.

രണ്ടുദശാബ്ദക്കാലമായി തങ്ങലുടെ കുടുംബത്തോടൊപ്പം ജീവിച്ച ഇന്ത്യയുടെ വേര്‍പാട്‌ കനത്ത ദുഖമാണ്‌ ബുഷ്‌ കുടുംബത്തിനുണ്ടാക്കിയതെന്ന്‌ ലോറ ബുഷിന്റെ പ്രസ്‌ സെക്രട്ടറി സാലി ഡൊണാഫ്‌ പറഞ്ഞു.

ബുഷിന്റെ മകള്‍ ബാര്‍ബറയായിരുന്നു ഈ കറുത്ത പെണ്‍പൂച്ചയ്‌ക്ക്‌ ഇന്ത്യയെന്ന്‌ പേരിട്ടത്‌. ഇന്ത്യയെന്ന പേര്‌ കൂടാതെ ഇതിനെ ബുഷും കുടുംബവും വില്ലിയെന്നും, കിറ്റിയെന്നും വിളിച്ചിരുന്നു.

ജനുവരി 20ന്‌ നിയുക്ത പ്രസിഡന്റ്‌ ബരാക്‌ ഒബാമ സ്ഥാനമേല്‍ക്കുന്നതോടെ ബുഷും കുടുംബവും വൈറ്റ്‌ ഹൗസില്‍ നിന്നും താമസം മാറ്റും.