അമേരിക്കന്‍ വീഥിയില്‍ ആറുവയസ്സുകാരന്റെ കാറോട്ടം!!

വെര്‍ജീനിയ: സ്‌കൂള്‍ ബസ്‌ പോയതിനെത്തുടര്‍ന്ന്‌ ആറു വയസ്സുകാരന്‍ കാറോടിച്ച്‌ സ്‌കുളില്‍ പോയി. അമേരിക്കയിലെ വെര്‍ജീനിയയിലാണ്‌ സംഭവം നടന്നത്‌.

രാവിലെ ഒരുങ്ങാന്‍ വൈകിയതിനെത്തുടര്‍ന്നാണ്‌ സ്‌കൂള്‍ ബസ്‌ കിട്ടാതെ പോയത്‌. പിന്നീട്‌ കൃത്യസമയത്ത്‌ സ്‌കൂളിലെത്താനാണ്‌ കുട്ടി ഈ സാഹസം കാണിച്ചത്‌. ഉറങ്ങുകയായിരുന്നു അച്ഛനും അമ്മയും കുട്ടി കാറുമെടുത്ത്‌ സ്‌കൂളിലേയ്‌ക്ക്‌ തിരിച്ച കാര്യം അറിഞ്ഞില്ല.

കുട്ടിയ്‌ക്ക്‌ യഥാര്‍ത്ഥത്തില്‍ കാറോടിക്കാന്‍ അറിയുമായിരുന്നില്ല. കമ്പ്യൂട്ടര്‍ ഗെയിമില്‍ കാറോടിച്ചുള്ള പരിചയം വച്ചാണ്‌ അച്ഛന്റെ ഫോര്‍ഡ്‌ കാറുമായി കുട്ടി റോഡിലിറങ്ങിയത്‌. സ്‌കൂളിലേയ്‌ക്കുള്ള ഓട്ടത്തിനിടയില്‍ കാര്‍ ചിലയിടങ്ങളില്‍ ഇടിയ്‌ക്കുകയും ചെറിയ അപകടങ്ങള്‍ സംഭവിക്കുകയും ചെയ്‌തു.

എന്തായാലും കുട്ടി ഡ്രൈവര്‍ കൃത്യസമയത്ത്‌ തന്നെ സ്‌കൂളിലെത്തിയിരുന്നു. നിരത്തിലൂടെ അപകടകരമായി പോകുന്ന കാര്‍ കണ്ട പൊലീസ്‌ അതിനെ പിന്തുടര്‍ന്ന്‌ സ്‌കൂളിലെത്തി.

എന്തിനാണ്‌ കാറോടിച്ച്‌ വന്നതെന്ന ചോദ്യത്തിന്‌ കൃത്യസമയത്ത്‌ സ്‌കൂളിലെത്താനാണ്‌ കാറുമായി വന്നതെന്നായിരുന്നുവത്രേ കുട്ടിയുടെ ഉത്തരം. കുട്ടി തങ്ങളെ അത്ഭുതപ്പെടുത്തിക്കളഞ്ഞെന്നും സീറ്റ്‌ ബെല്‍റ്റ്‌ പോലും ധരിക്കാതെയായിരുന്നു ആറുവയസ്സുകാരന്റെ ഈ സാഹസമെന്നും പത്തുകിലോമീറ്ററാണ്‌ കുട്ടി ഇങ്ങനെ കാറോടിച്ചതെന്നും പൊലീസ്‌ പറഞ്ഞു.

പൊലീസ്‌ പറഞ്ഞപ്പോള്‍ മാത്രമാണ്‌ മകന്റെ സഹാസപ്രവൃത്തിയെക്കുറിച്ച്‌ മാതാപിതാക്കള്‍ അറിഞ്ഞത്‌. കുട്ടിയുടെ കാര്യത്തില്‍ അശ്രദ്ധ കാണിച്ചതിന്‌ മാതാപിതാക്കള്‍ക്കെതിരെ പൊലീസ്‌ കേസെടുത്തിട്ടുണ്ട്‌. കുട്ടിയുടെയും മാതാപിതാക്കളുടെയും യഥാര്‍ത്ഥ വിവരങ്ങള്‍ പൊലീസ്‌ പുറത്തുവിട്ടിട്ടില്ല. സാഹസിക ഡ്രൈവിങിനിടെ കുട്ടിയ്‌ക്ക്‌ ചെറിയ പരുക്കുകള്‍പറ്റിയിട്ടുണ്ട്‌.