ലോറി സമരം തുടരുന്നു; ചര്‍ച്ചയ്‌ക്കില്ലെന്ന്‌ ഉടമകള്‍

ദില്ലി: രാജ്യവ്യാപകമായി നടക്കുന്ന ചരക്കുലോറി സമരം ഏഴാം ദിവസത്തിലേയ്‌ക്ക്‌ കടുന്നു. സമരവും അതുമൂലമുണ്ടായ വിലക്കയറ്റവും ജനജീവിതത്തെ രൂക്ഷമായി ബാധിച്ച സാഹചര്യത്തില്‍ കേന്ദ്രഗതാഗതമന്ത്രി ടിആര്‍ ബാലു ട്രക്കുടമകളെ ചര്‍ച്ചയ്‌ക്ക്‌ ക്ഷണിച്ചിട്ടുണ്ട്‌.

എന്നാല്‍ അവശ്യ സേവന നിയമ(എസ്‌മ) പ്രകാരം അറസ്റ്റുചെയ്‌ത നേതാക്കളെ വിട്ടയയ്‌ക്കാതെ ചര്‍ച്ചക്കില്ലെന്നാണ്‌ ട്രക്കുടമകളുടെ സംഘടനയായ ഓള്‍ ഇന്ത്യാ മോട്ടോര്‍ ട്രാന്‍സ്‌പോര്‍ട്‌ കോണ്‍ഗ്രസിന്റെ(എഐഎംടിസി)നിലപാട്‌.

സംഘടനാ പ്രസിഡന്റ്‌ ചരണ്‍ സിങ്‌ ലോറ, സെക്രട്ടറി എസ്‌ വേണുഗോപാല്‍ എന്നിവരുള്‍പ്പെടെ 32 പേരെ വെള്ളിയാഴ്‌ച അറസ്റ്റുചെയ്‌തിരുന്നു. സമരത്തെക്കുറിച്ച്‌ ചര്‍ച്ചചെയ്യാന്‍ സംസ്ഥാന ഗതാഗതമന്ത്രിമാരുടെ യോഗം തിങ്കളാഴ്‌ച ദില്ലിയില്‍ ചേരുന്നുണ്ട്‌.

ഡീസല്‍വില 10 രൂപ കുറയ്‌ക്കണമെന്നും ടയര്‍ വിലയിലെ അപാകം പരിഹരിക്കണമെന്നും ആവശ്യപ്പെട്ടാണ്‌ ലോറി ഉടമകള്‍ സമരം നടത്തുന്നത്‌. ഡീസല്‍വില 3രൂപയും, പെട്രോള്‍ വില 5രൂപയും കുറയ്‌ക്കാമെന്ന കേന്ദ്രനിലപാട്‌ സ്വീകാര്യമല്ലെന്നാണ്‌ ഉടമകള്‍ പറയുന്നത്‌.

സമരത്തെത്തുടര്‍ന്ന്‌ രാജ്യത്തിന്റെ പലഭാഗങ്ങളിലും ചരക്കുനീക്കം സ്‌തംഭിച്ചിരിക്കുകയാണ്‌. 60 ലക്ഷം ലോറികളാണ്‌ സമരത്തില്‍ പങ്കെടുക്കുന്നത്‌.