നാര്‍കോ സിഡി: സത്യവാങ്‌മൂലം സമര്‍പ്പിക്കണമെന്ന്‌ കോടതി

കൊച്ചി: സിസ്റ്റര്‍ അഭയ കേസില്‍ വൈദികരെയും കന്യാസ്‌ത്രീയെയും നാര്‍കോ പരിശോധനയ്‌ക്ക്‌ വിധേയരാക്കിയതിന്റെ യഥാര്‍ത്ഥ സിഡികള്‍ കണ്ടെടുക്കാന്‍ സിബിഐ എന്ത്‌ നടപടിയാണ്‌ സ്വീകരിച്ചതെന്ന്‌ വ്യക്തമാക്കാന്‍ എറണാകുളം സിജെഎം കോടതി ആവശ്യപ്പെട്ടു.

ജനുവരി 19നകം അന്വേഷണച്ചുമതലയുള്ള ഉദ്യോഗസ്ഥന്‍ ഇതുസംബന്ധിച്ച്‌ സത്യവാങ്‌മൂലം നല്‍കണമെന്നും കോടതി നിര്‍ദ്ദേശിച്ചു. അഭയയുടെ പിതാവ്‌ തോമസ്‌ ഐക്കരക്കുന്നേല്‍ സമര്‍പ്പിച്ച ഹര്‍ജി പരിഗണിച്ചുകൊണ്ടാണ്‌ കോടതി ഉത്തരവ്‌.

ബാംഗ്ലൂരിലെ ഫോറന്‍സിക്‌ ലാബില്‍ നടന്ന നാര്‍കോ പരിശോധനയുടെ സിഡികളില്‍ കൃത്രിമം നടന്നതായി ഹൈക്കോടതി നിരീക്ഷിച്ചിരുന്നു. ഈ സാഹചര്യത്തില്‍ യഥാര്‍ത്ഥ സിഡികള്‍ കണ്ടെടുത്ത്‌ സത്യാവസ്ഥ പരിശോധിക്കണമെന്നായിരുന്നു ഹര്‍ജിക്കാരന്റെ ആവശ്യം.

ലാബ്‌ സ്വമേധയാ സിഡി നല്‍കാന്‍ തയ്യാറായില്ലെങ്കില്‍ റെയ്‌ഡ്‌ നടത്തി സിഡി കണ്ടെത്താന്‍ സിബിഐയ്‌ക്ക്‌ നിര്‍ദ്ദേശം നല്‍കണമെന്നും ഹര്‍ജിക്കാരന്‍ ആവശ്യപ്പെട്ടിരുന്നു. ജനുവരി 19നാണ്‌ ഇനി കേസ്‌ പരിഗണിക്കുക.