അഭയ കേസ്‌ : മേല്‍നോട്ടം ഡിവിഷന്‍ ബഞ്ചിന്‌

കൊച്ചി: അഭയക്കേസ്‌ പരിഗണിക്കുന്നതില്‍ നിന്നും ജസ്റ്റിസ്‌ ആര്‍. ബസന്ത്‌ പിന്‍മാറി. ഇതോടൊപ്പം അന്വേഷണത്തിന്റെ നിരീക്ഷണ ചുമതല ഡിവിഷന്‍ ബഞ്ചിന്‌ കൈമാറുകയും ചെയ്‌തു.

ജുഡീഷ്യറിയുടെ യശസ്സുയര്‍ത്തുന്നതിനാണ്‌ ഈ തീരുമാനം. ഇക്കാര്യത്തില്‍ വിവാദങ്ങളുണ്ടായതില്‍ വിഷമമുണ്ടെന്നും ജസ്‌റ്റിസ്‌ ബസന്ത്‌ പറഞ്ഞു.

ബുധനാഴ്‌ച വൈകിട്ട്‌ നാലു മണിക്ക്‌ ഇരുഭാഗത്തെയും അഭിഭാഷകരെ വിളിച്ചുവരുത്തിയാണ്‌ ജസ്റ്റിസ്‌ ആര്‍. ബസന്ത്‌ നിരീക്ഷണത്തിനുള്ള അധികാരം ഡിവിഷന്‍ ബഞ്ചിന്‌ കൈമാറുന്നതായി അറിയിച്ചത്‌. നേരത്തെ കേസ്‌ പരിഗണിയ്‌ക്കുന്നതില്‍ നിന്നും ജസ്റ്റിസ്‌ രാംകുമാറും പിന്‍മാറിയിരുന്നു.

അഭയ കേസില്‍ ഹൈക്കോടതിയുടെ വിവിധ ബഞ്ചുകളുടെ വ്യത്യസ്‌ത നിലപാടുകള്‍ സിബിഐയെ ആശയക്കുഴപ്പത്തിലാക്കിയിരിക്കുകയാണ്‌.

നിലവിലുള്ള അന്വേഷണ സംഘത്തിനെ നിലനിര്‍ത്തി അന്വേഷണം തുടരാമെന്നാണ്‌ കേസ്‌ നിരീക്ഷിച്ചിരുന്ന ജസ്റ്റീസ്‌ ബസന്ത്‌ നിര്‍ദ്ദേശിച്ചിരുന്നത്‌. എന്നാല്‍ ഇപ്പോഴുള്ളതിനേക്കാള്‍ മുതിര്‍ന്ന ഉദ്യോഗസ്ഥന്‍ കേസിന്‌ മേല്‍നോട്ടം വഹിക്കണമെന്ന ജാമ്യവിധിയിലെ നിര്‍ദ്ദേശം പാലിച്ചില്ലെങ്കില്‍ കോടതിയലക്ഷ്യ നടപടി നേരിടേണ്ടി വരുമെന്ന്‌ ജസ്‌റ്റിസ്‌ കെ. ഹേമ സിബിഐക്ക്‌ മുന്നറിയിപ്പ്‌ നല്‌കിയിരുന്നു.

പ്രതികള്‍ക്ക്‌ ജാമ്യമനുവദിച്ചു കൊണ്ട്‌ ജസ്റ്റിസ്‌ ഹേമ നടത്തിയ പരാമര്‍ശങ്ങളെ തുടര്‍ന്ന്‌ ആശയക്കുഴപ്പത്തിലായ സിബിഐ അന്വേഷണം നിര്‍ത്തിവെച്ചത്‌ നിരീക്ഷണ കോടതിയുടെ വിമര്‍ശനം ക്ഷണിച്ചുവരുത്തിയിരുന്നു. അന്വേഷണ, മേല്‍നോട്ട സംഘങ്ങളെ അതേപടി നിലനിര്‍ത്തുമെന്ന കാര്യം സിബിഐ രേഖാമൂലം അറിയിച്ചിട്ടുണ്ടെങ്കിലും ജാമ്യക്കോടതി അത്‌ പരിഗണിക്കാനിരിക്കുന്നേയുള്ളൂ.