കാരള്‍ ബാട്‌സ്‌ യാഹൂവിന്റെ പുതിയ സിഇഒ

ന്യൂയോര്‍ക്ക്‌: യാഹൂവിന്റെ പുതിയ ചീഫ്‌ ഓപ്പറേറ്റിങ്‌ ഓഫീസറായി കാരള്‍ ബാട്‌സിനെ തിരഞ്ഞെടുത്തു. രാജ്യാന്തര സോഫ്‌റ്റ്‌വെയര്‍ ഡിസൈന്‍ കമ്പനിയായ ഓട്ടോഡസ്‌ക്കിന്റെ എക്‌സിക്യൂട്ടീവ്‌ ചെയര്‍മാനാണ്‌ ബാര്‍ട്‌സിപ്പോള്‍.

വാള്‍സ്‌ട്രീറ്റ്‌ ജേര്‍ണലാണ്‌ ഈ വാര്‍ത്ത പുറത്തുവിട്ടിരിയ്‌ക്കുന്നത്‌. യാഹൂവിന്റെ ഓഫര്‍ ബാര്‍ട്‌സ്‌ സ്വീകരിച്ചിട്ടുണ്ടെന്നാണ്‌ റിപ്പോര്‍ട്ട്‌.

യാഹൂവിന്റെ സ്ഥാപകന്‍മാരില്‍ ഒരാളും ചീഫ്‌ എക്‌സിക്യൂട്ടീവുമായ ജെറി യാങ്‌ തന്റെ പദവി രാജിവെയ്‌ക്കുന്നതായി കഴിഞ്ഞ നവംബറില്‍ പ്രഖ്യാപിച്ചിരുന്നു. യാഹൂ ഏറ്റെടുക്കാനുള്ള മൈക്രോസോഫ്‌റ്റിന്റെ ശ്രമങ്ങള്‍ക്ക്‌ തടഞ്ഞതിന്റെ പേരില്‍ അദ്ദേഹം ഏറെ വിമര്‍ശിക്കപ്പെട്ടിരുന്നു.

ഇടക്കാലത്ത്‌ ഗൂഗിളുമായി ഉണ്ടാക്കാന്‍ ശ്രമിച്ച കരാറും ലക്ഷ്യം കാണാതെ പോയതോടെ യാഹൂ ഓഹരികളുടെ വിലയില്‍ വന്‍തകര്‍ച്ച നേരിട്ടിരുന്നു. ഇതൊക്കെയാണ്‌ ജെറിയുടെ രാജിയില്‍ കൊണ്ടുചെന്നെത്തിച്ചത്‌. പുതിയ സിഇഒയെ കണ്ടെത്തുന്നതോടെ സ്ഥാനമൊഴിയുമെന്നായിരുന്നു ജെറിയുടെ പ്രഖ്യാപനം.

യാഹൂവിന്റെ ഭരണസമിതിയില്‍ തുടരുമെന്ന്‌ ജെറി യാങ്‌ അറിയിച്ചിട്ടുണ്ട്‌. കമ്പനിയുടെ കോര്‍പറേറ്റ്‌ തന്ത്രങ്ങള്‍ നിയന്ത്രിക്കുന്ന ചീഫ്‌ യാഹൂ എന്ന പഴയ തസ്‌തികയിലും ജെറി യാങ്‌ തുടരുമെന്ന്‌ കമ്പനി വക്താക്കള്‍ അറിയിച്ചു.