മായയ്ക്ക് മറക്കാനാകാത്ത പിറന്നാള് സമ്മാനം
ലഖ്നൊ: മായാവതിയ്ക്കല്ലാതെ മറ്റേതെങ്കിലുമൊരു മുഖ്യമന്ത്രിയ്ക്ക് ഈ ഭാഗ്യം ഉണ്ടായിട്ടുണ്ടാകാന് ഇടയില്ല. പിറന്നാള് സമ്മാനമായി ഉത്തര്പ്രദേശ് തലസ്ഥാനമായ ലഖ്നൊ നഗരത്തിന്റെ ഭാഗങ്ങളിലുമുള്ള ദമ്പതിമാര് മറക്കാന് കഴിയാത്ത പിറന്നാള് സമ്മാനമാണ് മായാവതിയ്ക്ക് നല്കിയത്.
നാല്പതോളം ദമ്പതികള് അവര്ക്ക് പിറന്ന കുഞ്ഞുങ്ങള്ക്ക് നല്കിയത് തങ്ങളുടെ പ്രിയ്യപ്പെട്ട മുഖ്യമന്ത്രിയുടെ പേരാണ്. മായാവതിയുടെ അമ്പത്തിമൂന്നാം പിറന്നാള് ദിനമായ വ്യാഴാഴ്ചയും വെള്ളിയാഴ്ചയുമായി പിറന്ന നാല്പതോളം കുഞ്ഞുങ്ങള്ക്കാണ് മായാവതി എന്ന് പേരിട്ടിരിക്കുന്നത്.
ബഹന്ജിയുടെ ധീരതയെയും ആത്മാര്ത്ഥതയെയും ആരാധിക്കുന്നതുകൊണ്ടാണ് താന് കുഞ്ഞിന് മായാവതി എന്ന് പേരിട്ടിരിക്കുന്നതെന്ന് സുമന്ലത എന്ന അമ്മ പറഞ്ഞു. പല കുടുംബങ്ങളിലും അമ്മമാരോ മുത്തശ്ശിമാരോ ആണ് കുഞ്ഞുങ്ങള്ക്ക് മായാവതി എന്ന് പേരിടാന് തീരുമാനിച്ചത്.
ഹിന്ദു, മുസ്ലിം ഭേദമില്ലാതെ പല കുടുംബങ്ങളും കുഞ്ഞുങ്ങള്ക്ക് മായാവതിയെന്ന് പേരിട്ടിട്ടുണ്ട്. ഹിന്ദു ദമ്പതിമാര് കുട്ടികള്ക്ക് മായാവതി റാണി എന്ന് പേരിട്ടപ്പോള് മുസ്ലിം കുടുംബങ്ങള് മായാവതി ബാനു എന്നാണ് പെണ്കുട്ടികള്ക്ക് പേരിട്ടിരിക്കുന്നത്. ലഖ്നൊവിലെ നാല് സര്ക്കാര് ആശുപത്രികളാണ് നാല്പതോളം കുട്ടികള്ക്ക് മായാവതിയുടെ പേരിട്ടിരിക്കുന്നകാര്യം റിപ്പോര്ട്ട് ചെയ്തത്.
ദാരിദ്ര്യരേഖയ്ക്ക താഴെയുള്ള കുടുംബങ്ങളിലെ പെണ്കുട്ടികള്ക്ക് 18 വയസ്സ് പൂര്ത്തിയാകുമ്പോള് ഒരു ലക്ഷം രൂപ വീതം സഹായം നല്കുമെന്ന് പിറന്നാള് ദിനത്തില് മായാവതി പ്രഖ്യാപിച്ചിട്ടുണ്ട്.