സിബ്‌ബാവെയില്‍ കോടിക്കോടി ഡോളറിന്റെ ഒറ്റനോട്ട്‌

ഹരാരെ: പണപ്പെരുപ്പം 23 കോടി ശതമാനത്തിലേക്ക്‌ കുതിച്ചുയര്‍ന്ന സിബ്‌ബാവെ കോടിക്കോടി ഡോളറിന്റെ ഒറ്റനോട്ടിറക്കുന്നു. പണപ്പെരുപ്പം മൂലമുള്ള പ്രതിസന്ധി പരിഹരിയ്‌ക്കാനാണ്‌ സര്‍ക്കാര്‍ ഇത്തരമൊരു നീക്കം നടത്തുന്നത്‌.

കോടിക്കോടി ഡോളറിന്റെ ഒറ്റനോട്ട്‌ പുറത്തിറങ്ങുന്നതോടെ ചാക്കിലും സഞ്ചിയിലുമൊക്കെ പണം ചുമക്കേണ്ടി വരുന്ന ജനങ്ങളുടെ ബുദ്ധിമുട്ടിന്‌ ഇത്തിരി കുറവ്‌ വരുമെന്നാണ്‌ കരുതപ്പെടുന്നത്‌. സിബ്‌ബാവെയുടെ നൂറ്‌ ട്രില്ല്യണ്‍ ഡോളര്‍ നോട്ടിന്‌ പക്ഷേ 33 അമേരിക്കന്‍ ഡോളറിന്റെ മൂല്യമേ ഉണ്ടാകുകയുള്ളൂ.

50 ലക്ഷം കോടി ഡോളറിന്റെ നോട്ട്‌ പുറത്തിറക്കിയതിന്‌ പിന്നാലെയാണ്‌ 100 ട്രില്ല്യണ്‍ നോട്ടിറക്കാന്‍ സര്‍ക്കാര്‍ തീരുമാനിച്ചത്‌. കടുത്ത സാമ്പത്തിക പ്രതിസന്ധി നേരിടുന്ന രാജ്യത്തെ തൊഴിലില്ലായ്‌മ 80 ശതമാനമാണ്‌.

സാമ്പത്തിക തകര്‍ച്ചയ്‌ക്കിടെ രാജ്യത്ത്‌ പടര്‍ന്നു പിടിച്ച കോളറ മൂലം 2,225 പേര്‍ മരിച്ചതായി ഐക്യരാഷ്ട്ര സഭ അധികൃതര്‍ അറിയിച്ചിട്ടുണ്ട്‌.