എട്ടുവയസ്സുകാരിയ്‌ക്ക്‌ തവള വരന്‍

പുതുച്ചേരി: നായയെയും പാമ്പിനെയുമൊക്കെ വിവാഹം ചെയ്യുന്ന വാര്‍ത്തകള്‍ ഇതിനകം തന്നെ നമ്മള്‍ കേട്ടിട്ടുണ്ട്‌. ഇപ്പോഴിതാ ഒരു തവളക്കല്ല്യാണവും റിപ്പോര്‍ട്ട്‌ ചെയ്യപ്പെട്ടിരിക്കുന്നു.

തമിഴ്‌നാട്ടിലെ വില്ലുപുരം ജില്ലയിലാണ്‌ തവള വരനായത്‌, വധുവാകട്ടെ ഒരു എട്ടുവയസ്സുകാരിയും. ഗ്രാമവാസികള്‍ക്ക്‌ ആയുരാരോഗ്യം ലഭിക്കാനും ക്ഷുദ്രശക്തികളെ അകറ്റാനുമാണത്രേ തവളക്കല്യാണം നടത്തിയത്‌.

ഗ്രാമത്തിലെ എട്ടുവയസ്സുകാരിയായ ആര്‍ വിഘ്‌നേശ്വരിയാണ്‌ വധുവായത്‌. ഇവിടത്തെ ഒരു ദേവീക്ഷേത്രത്തിലെ കുളത്തില്‍ നിന്നാണ്‌ വരനായ തവളയെ പിടികൂടിയത്‌. ക്ഷേത്രക്കുളത്തിന്റെ പടിഞ്ഞാറുഭാഗത്തുള്ള ജനങ്ങള്‍ തവള വരന്റെ ബന്ധുക്കളായി കല്യാണത്തിനെത്തി.

അലങ്കരിച്ചൊരുക്കിയ വധുവിനെ ക്ഷേത്രക്കുളക്കടവില്‍ കൊണ്ടുവന്നാണ്‌ മൂന്നു മണിക്കൂര്‍ നീണ്ടുനിന്ന വിവാഹച്ചടങ്ങുകള്‍ നടത്തിയത്‌. തവള വരന്‌ വധുവിനെ താലിചാര്‍ത്താന്‍ കഴിയാത്തതിനാല്‍ ആ കര്‍മ്മം നിര്‍വ്വഹിച്ചത്‌ ക്ഷേത്രത്തിലെ പുരോഹിതനാണ്‌.

വിവാഹശേഷം അതിഥികളെല്ലാം വരനെയും വധുവിനെയും അനുഗ്രഹിച്ച്‌ സമ്മാനമായി പണവും നല്‍കി. കല്യാണത്തിന്‌ ശേഷം സദ്യയും ഒരുക്കിയിരുന്നു. ചടങ്ങുകള്‍ക്ക്‌ ശേഷം വരനായ തവളയെ ക്ഷേത്രക്കുളത്തിലേയ്‌ക്കുതന്നെ വിട്ടയച്ചു.

നൂറ്റാണ്ടുകള്‍ക്ക്‌ മുമ്പുതന്നെ ഇത്തരം സമ്പ്രദായം നിലവിലുണ്ടെന്നും ഇങ്ങനെ ചെയ്‌താല്‍ ആരാധനാ മൂര്‍ത്തിയായ മാരിയമ്മന്‍ തങ്ങളെ ദുഷ്ടശക്തികളില്‍ നിന്നും രക്ഷിക്കുമെന്നും ഗ്രാമത്തിലെ ഒരു വൃദ്ധസ്‌ത്രീ പറഞ്ഞു.

മുമ്പ്‌ ഗ്രാമത്തില്‍ കോളറ പോലുള്ള രോഗങ്ങള്‍ പടര്‍ന്നു പിടിച്ചു. ഈ സമയത്ത്‌ രക്ഷയ്‌ക്കായി പ്രാര്‍ത്ഥിച്ചപ്പോള്‍ ഗ്രമവാസികളില്‍ ഒരാളുടെ സ്വപ്‌നത്തില്‍ പ്രത്യക്ഷപ്പെട്ട മാരിയമ്മന്‍ ഇത്തരത്തിലുള്ള വിശുദ്ധ വിവാഹം വര്‍ഷം തോറും നടത്താന്‍ നിര്‍ദ്ദേശിക്കുകയായിരുന്നുവത്രേ.