രാജീവ്‌ ഗാന്ധിയുടെ പ്രതിമയെ അവഹേളിച്ചു

ചെന്നൈ: പുതുച്ചേരിയില്‍ അന്തരിച്ച മുന്‍ പ്രധാനമന്ത്രി രാജീവ്‌ ഗാന്ധിയുടെ പ്രതിമയെ അവഹേളിച്ചു. ഇതിനെത്തുടര്‍ന്നുണ്ടായ സംഘര്‍ഷത്തില്‍ നഗരസഭാ കൗണ്‍സിലര്‍ അടക്കം എട്ട്‌ കോണ്‍ഗ്രസുകാര്‍ക്ക്‌ പരുക്കേറ്റു.

വിടുതലൈ ചിരുതൈകള്‍ കക്ഷി പ്രവര്‍ത്തകരുടെ ആക്രമണത്തിലാണ്‌ ഇവര്‍ക്ക്‌ പരുക്കേറ്റത്‌. സംഭവവുമായി ബന്ധപ്പെട്ട്‌ പതിമൂന്ന്‌ വിസികെ പ്രവര്‍ത്തകരെ പൊലീസ്‌ അറസ്റ്റ്‌ ചെയ്‌തു. തിങ്കളാഴ്‌ച രാവിലെയാണ്‌ പുതുച്ചേരി എള്ളപിള്ള ചാവടിയിലെ തീരദേശ റോഡിന്‌ സമീപം സ്ഥാപിച്ചിരിക്കുന്ന രാജീവ്‌ ഗാന്ധി പ്രതിമയില്‍ ചെരുപ്പുമാല കാണുന്നത്‌.

ശ്രീലങ്കന്‍ പ്രസിഡന്റ്‌ രാജപക്‌സെയുടെ കോലത്തിന്‌ ചാര്‍ത്തിയ ചെരുപ്പുമാല രാജീവിന്റെ പ്രതിമയില്‍ ചാര്‍ത്തുകയായിരുന്നു. സംഭവമറിഞ്ഞെത്തിയ പൊലീസ്‌ ചെരുപ്പുമാല എടുത്തുമാറ്റിയെങ്കിലും പ്രതിഷേധവുമായി എത്തിയ കോണ്‍ഗ്രസ്‌ പ്രവര്‍ത്തകര്‍ കുറ്റവാളികളെ പിടികൂടണമെന്ന ആവശ്യവുമായി തീരദേശ റോഡില്‍ കുത്തിയിരിപ്പ്‌ സമരം നടത്തി.

ഇതിനെതിരെ കോണ്‍ഗ്രസിന്റെ പ്രവൃത്തിയില്‍ പ്രതിഷേധിച്ച്‌ വിസികെ പ്രവര്‍ത്തകര്‍ എതിര്‍ഭാഗത്ത്‌ തടിച്ചുകൂടി. ഇതറിഞ്ഞ്‌ ചില മന്ത്രിമാരും കോണ്‍ഗ്രസ്‌ നേതാക്കളും സ്ഥലത്തെത്തി. പൊലീസ്‌ വിസികെ പ്രവര്‍ത്തകരെ ഓടിച്ചെങ്കിലും പിന്നീട്‌ ഇവര്‍ ആക്രമണം നടത്തുകയായിരുന്നു. കുറ്റവാളികളെ ഉടന്‍ പിടികൂടുമെന്നും ശ്രീലങ്കന്‍ പ്രശ്‌നത്തിന്റെ പേരില്‍ അക്രമം നടത്താന്‍ ആരെയും അനുവദിക്കില്ലെന്നും മന്ത്രി വത്സരാജ്‌ പറഞ്ഞു.