അമേരിക്കിയില്‍ പുതുയുഗപ്പിറവി

വാഷിങ്‌ടണ്‍: ഒടുവില്‍ മാറ്റത്തിന്റെ ദിനം ആഗതമായി. യുണൈറ്റഡ്‌ സ്‌റ്റേറ്റ്‌സ്‌ ഓഫ്‌ അമേരിക്കയുടെ ചരിത്രത്തിലെ ആദ്യ കറുത്ത വര്‍ഗക്കാരനായ പ്രസിഡന്റായി ബരാക്‌ ഒബാമ(47) ചൊവ്വാഴ്‌ച അധികാരമേല്‌ക്കുന്നു. വൈറ്റ്‌ഹൗസിനുള്ളിലെ മാറ്റത്തിന്റെ കാറ്റായി മാറുമെന്ന്‌ അമേരിക്കക്കാര്‍ പ്രതീക്ഷിയ്‌ക്കുന്ന ഈ യുവതേരാളിയുടെ സത്യപ്രതിജ്ഞ ചടങ്ങ്‌ നേരിട്ട്‌ വീക്ഷിയ്‌ക്കാന്‍ 20 ലക്ഷം പേരാണ്‌ എത്തുക.

വാഷിങ്‌ടണ്‍ സമയം രാവിലെ 11.30നാണ്‌ (ഇന്ത്യന്‍ സമയം ചൊവ്വാഴ്‌ച രാത്രി 11.30) അമേരിക്കയുടെ 44ാമത്‌ പ്രസിഡന്റിന്റെ സ്ഥാനാരോഹണ ചടങ്ങുകള്‍. 1861ല്‍ അമേരിക്കയുടെ 16ാമത്‌ പ്രസിഡന്റായി സത്യപ്രതിജ്ഞ ചെയ്‌ത എബ്രാഹാം ലിങ്കണ്‍ ഉപയോഗിച്ച അതേ ബൈബിള്‍ തന്നെയായിരിക്കും ഒബാമയും സത്യപ്രതിജ്ഞയ്‌ക്കായി കൈയ്യോട്‌ ചേര്‍ത്തു പിടിയ്‌ക്കുക.

അമേരിക്കയെ സംബന്ധിച്ചിടത്തോളം മറ്റേത്‌ പ്രസിഡന്റിന്റെ സ്ഥാനാരോഹണത്തേക്കാളും പ്രധാന്യമര്‍ഹിയ്‌ക്കുന്ന നിമിഷമാണിത്‌. മാര്‍ട്ടിന്‍ ലൂഥര്‍ കിങ്ങിന്റെ സ്വപ്‌നം സഫലമാകുന്ന ദിനം. ക്യാപിറ്റോളിനും ലിങ്കണ്‍ സ്‌മാരകത്തിനും വെളിയില്‍ നാഷണല്‍ മാളിലാണ്‌ ചരിത്രത്തിന്റെ ഭാഗമായി മാറുന്ന സത്യപ്രതിജ്ഞ ചടങ്ങുകള്‍ നടക്കുക.

രൂക്ഷമായ സാമ്പത്തിക പ്രതിസന്ധിയും തീവ്രവാദ ഭീഷണികളും നേരിടുന്ന യുഎസിനെ നിര്‍ണായകഘട്ടത്തില്‍ നയിക്കാന്‍ നിയോഗിക്കപ്പെട്ട ഒബാമ തനിയ്‌ക്ക്‌ മുന്നിലെ വെല്ലുവിളികള്‍ എന്തെന്ന്‌ തിരിച്ചറിയുന്നുണ്ട്‌.

എന്തിനെയും നേരിടാന്‍ സാധ്യമാണെന്നതിന്‌ തെളിവ്‌ തന്റെ വിജയം തന്നെയാണെന്നും സാമ്പത്തിക മാന്ദ്യമടക്കമുള്ള വെല്ലുവിളികളെ നേരിടാന്‍ രാജ്യത്തിന്‌ കഴിയുമെന്ന്‌ തനിയ്‌ക്ക്‌ ആത്മവിശ്വാസമുണ്ടെന്നും ഈ യുവപോരാളി പറയുന്നു.