സത്യത്തില് നിന്നും രാജു കോടികള് തട്ടിയെന്ന് റിപ്പോര്ട്ട്
ന്യൂയോര്ക്ക്: സാമ്പത്തിക ക്രമക്കേട് നടത്തിയെന്ന് ഏറ്റുപറഞ്ഞുകൊണ്ട് രാജിവച്ച സത്യം കമ്പ്യൂട്ടേഴ്സ് മുന് ചെയര്മാന് രാമലിംഗരാജുവിനെതിരെ കൂടുതല് ആരോപണങ്ങള്.
രാജു സത്യത്തില് നിന്നും കോടികള് കൈക്കലാക്കിയതായി ന്യൂയോര്ക്ക് ടൈംസ് പത്രം റിപ്പോര്ട്ട് ചെയ്തു. ഒരു കോടി ഡോളര് ഏതാണ്ട് അമ്പത് കോടിയോളം രൂപ ഇദ്ദേഹം സത്യത്തില് നിന്നും തട്ടിയെടുത്തിട്ടുണ്ടെന്നാണ് റിപ്പോര്ട്ടില് പറയുന്നത്.
കമ്പനിയെ മുന്നിരയില് നിര്ത്താനായി ബാലന്സ് ഷീറ്റില് ക്രമക്കേട് കാണിച്ചിട്ടുണ്ടെങ്കിലും സ്വകാര്യ ആവശ്യങ്ങള്ക്കായി താനോ കമ്പനിയില് ഉണ്ടായിരുന്ന തന്റെ സഹോദരനോ ഒരു രൂപപോലും ചെലവാക്കിയിട്ടില്ലെന്ന് രാജിവച്ച ദിവസം രാജു അവകാശപ്പെട്ടിരുന്നു.
ന്യൂയോര്ക് ടൈംസില് വന്ന റിപ്പോര്ട്ടിനോട് രാജുവോ അദ്ദേഹവുമായി ബന്ധപ്പെട്ട വൃത്തങ്ങളോ ഇതേവരെ പ്രതികരിച്ചിട്ടില്ല. തട്ടിയെടുത്ത പണമുപയോഗിച്ച് രാജു പല കമ്പനികളുമായി ഇടപാടുകള് നടത്തിയിട്ടുണ്ടെന്നും ചില കമ്പനികള് സ്വന്തം പേരിലും കുടുംബാംഗങ്ങളുടെ പേരിലും രജിസ്റ്റര് ചെയ്തിട്ടുണ്ടെന്നും റിപ്പോര്ട്ടില് വ്യക്തമാക്കുന്നു.
ഇതിനിടെ സത്യത്തിന് കനത്തതിരിച്ചടി നല്കിക്കൊണ്ട് അമേരിക്കയിലെ പ്രമുഖ ഉപഭോക്താവ് കരാര് റദ്ദാക്കി. സ്റ്റേറ്റ് ഫാം ഇന്ഷുറന്സ് കമ്പനിയാണ് സത്യവുമായി ഉണ്ടാക്കിയ കരാര് റദ്ദാക്കിയത്. ഇതേസമയം സത്യത്തിന്റെ പ്രധാന ഉപഭോക്താക്കളുമായി കമ്പനി നേരിട്ട് ബന്ധപ്പെട്ടുവരുകയാണെന്നും 90 ശതമാനം ഉപഭോക്താക്കളും കമ്പനിയ്ക്കു പിന്തുണ ഉറപ്പാക്കിയിട്ടുണ്ടെന്നും സത്യം വൃത്തങ്ങള് വ്യക്തമാക്കി.