ഗജിനി കട്ട്‌ ഒബാമ കട്ടിന്‌ വഴിമാറി

ബാംഗ്ലൂര്‍: ലോകമൊട്ടാകെ ഇപ്പോള്‍ ഒബാമ തരംഗമാണ്‌. ഒബാമയുടെ മുഖച്ഛായയുള്ള ആളുകളെ കണ്ടെത്താനും ഒബാമ തിരിയുന്നതും നടക്കുന്നതും വരെ വാര്‍ത്തയാക്കാനും ലോകമൊട്ടാകെയുള്ള മാധ്യമങ്ങളും ആളുകളും മത്സരം നടത്തുന്നതിനിടെ ഇങ്ങ്‌ ബാംഗ്ലൂരില്‍ ഒബാമയുടെ ഹെയല്‍ സ്‌റ്റൈലാണ്‌ താരമാകുന്നത്‌.

അമീര്‍ ഖാന്റെ സൂപ്പര്‍ ഹിറ്റ്‌ ചിത്രം ഗജിനി പുറത്തിറങ്ങിയപ്പോള്‍ ഗജിനി കട്ട്‌ എന്ന പേരില്‍ ചിത്രത്തിലുള്ള അമീറിന്റെ ഹെയര്‍ സ്റ്റൈല്‍ തരംഗമായി. ഇപ്പോഴിതാ ബാംഗ്ലൂരിലെ യുവാക്കള്‍ ഒന്നാകെ ഒബാമ കട്ടിലേയ്‌ക്ക്‌ വഴിമാറുന്നു.

നഗരത്തിലെ മുടിവെട്ട്‌ കടകളിലെല്ലാം യുവാക്കള്‍ ഒബാമ കട്ട്‌ എന്ന ആവശ്യവുമായി എത്തുകയാണ്‌. പ്രത്യേകിച്ചും കോളെജ്‌ കുമാരന്മാര്‍ക്കിടയിലാണത്രേ ഒബാമകട്ടിന്‌ പ്രിയമുള്ളത്‌. മുടിവെട്ടാന്‍ വരുന്ന യുവാക്കളെല്ലാം ഒബാമ കട്ടാണ്‌ ആവശ്യപ്പെടുന്നതെന്ന്‌ നഗരത്തില്‍ വിവിധ സ്ഥലങ്ങളില്‍ സലൂണുകള്‍ നടത്തുന്നവര്‍ പറയുന്നു.

രാജ്യത്തൊട്ടാകെ സലൂണ്‍ ശൃംഗലയുള്ള പ്രമുഖ ഹെയര്‍ സ്റ്റൈലിസ്റ്റ്‌ ജാവേദ്‌ ഹബീബിന്റെ അഭിപ്രായത്തില്‍ ഒബാമ കട്ടും ഗജിനി കട്ടും തമ്മില്‍ വലിയ വ്യത്യാസമില്ല. ഗജിനി കട്ട്‌ കുറേക്കൂടി മുടി കളഞ്ഞ്‌ രണ്ട്‌ വരകള്‍ തെളിഞ്ഞ്‌ കാണുന്നവിധത്തിലാണ്‌. ഒബാമയുടെതിന്‌ ഇതില്‍ നിന്നും അല്‍പം വ്യത്യാസമേയുള്ളു. ഗജിനി കട്ടിന്റെ അത്ര ടഫ്‌ ലുക്ക്‌ ഒബാമ കട്ടിനില്ല- ജാവേദ്‌ പറയുന്നു.

ഒബാമ അധികാരത്തിലേറിയ ചൊവ്വാഴ്‌ചയാണ്‌ അദ്ദേഹത്തിന്റേതുപോലുള്ള ഹെയര്‍സ്‌റ്റൈല്‍ വേണമെന്നാവശ്യപ്പെട്ട്‌ കൂടുതല്‍ ആളുകള്‍ സലൂണുകളിലെത്തിയത്‌. ചില യുവാക്കളെത്തുന്നത്‌ കാമുകിമാരുടെ നിര്‍ദ്ദേശപ്രകാരം ഒബാമ കട്ട്‌ ചെയ്യാന്‍വേണ്ടിയാണത്രേ.