കാണിക്കയായി വിമാനം നല്കൂ വിദേശയാത്ര തരപ്പെടും
ജലന്ധര്: ഇന്ത്യ വിട്ട് ഏതെങ്കിലും ഒരു വിദേശരാജ്യത്ത് സ്ഥിരതാമസമാക്കണമെന്ന് വളരെക്കാലമായി ആഗ്രഹിക്കുകയാണോ എങ്കിലിതാ അതിനൊരു എളുപ്പവഴി. പഞ്ചാബിലെ ഒരു ഗുരുദ്വാരയിലേയ്ക്ക് ഒരു വിമാനം നേര്ച്ച നേരുക. ഏറെ നാളായുള്ള നിങ്ങളുടെ ആഗ്രഹം സഫലമാകില്ലെന്ന് ആരു കണ്ടു.
ഹോ ഒരു വിമാനമൊക്കെ എങ്ങനെ കൊടുക്കാന് കഴിയും എന്നാണ് കരുതുന്നതെങ്കില് ആശങ്കപ്പെടേണ്ട ചെറിയ വിമാനം മതി അതായത് വെറും കളിപ്പാട്ടം. ഈ വിശ്വാസത്തില് കഴമ്പുണ്ടോയെന്നകാര്യത്തില് ഉറപ്പൊന്നുമില്ലെങ്കിലും പഞ്ചാബിലെ പ്രത്യേകിച്ചും ഇവിടത്തെ ധോബ എന്ന സ്ഥലത്തുള്ള യുവാക്കളില് ഭൂരിപക്ഷവും ബാബാ നിഹാല് സിങ് ജി ഷഹീദാന് എന്ന ഈ ഗുരുദ്വാരയില് പോയി വിമാനങ്ങള് നേര്ച്ച നല്കുകയാണ്.
ഗുരുദ്വാരയില് സമര്പ്പിക്കുന്ന കളിവിമാനങ്ങളില് സ്വന്തം പേരെഴുതിയാണ് നല്കേണ്ടത്. ഏതാനും മാസങ്ങള്ക്ക് മുമ്പാണത്രേ ഈ രീതി ഇവിടെ ആരംഭിച്ചത്. ഏതോ ഒരാള് കുറച്ച് നാള് മുമ്പ് ഇങ്ങനെ കളിവിമാനം നേര്ച്ച നേര്ന്നപ്പോള് അയാള്ക്ക് വിദേശത്ത് സ്ഥിരതാമസമാക്കാന് സാധിച്ചുവെന്ന കഥ പരന്നതോടെയാണ് ആളുകള് കൂട്ടത്തോടെ ഇവിടെച്ചെന്ന് വിദേശത്ത് താമസിക്കാന് അനുഗ്രഹം ലഭിക്കാനായി കളിവിമാനം നേര്ന്ന് പ്രാര്ത്ഥന തുടങ്ങിയത്.
എന്തായാലും ഇങ്ങനെ നേര്ച്ചയായി കിട്ടുന്ന കളിവിമാനങ്ങള് സൂക്ഷിക്കാന് ഇപ്പോള് ഗുരുദ്വാരയില് സ്ഥലമില്ലാതായിരിക്കുന്നുവെന്നാണ് ഇവിടെത്തെ പുരോഹിതന് പറയുന്നത്. എന്തായാലും ഗുരുദ്വാരയ്ക്ക് സമീപമുള്ള കടകളില് കളിവിമാനക്കച്ചവടം പൊടിപൊടിയ്ക്കുകയാണ്.
150 മുതല് 500 രൂപവരെയുള്ള വിമാനങ്ങളാണ് ഈ കടകളില് വില്ക്കുന്നത്. ദിവസം പതിനഞ്ചോ ഇരുപതോ പേരെങ്കിലും ഇതുവാങ്ങാനായി എത്തുമെന്നും കടക്കാര് പറയുന്നു.
ഞായറാഴ്ചയാണത്രേ വിമാനം കൊണ്ടുവരുന്നവരുടെ എണ്ണം ഏറ്റവും കൂടുന്നത്, ചുരുങ്ങിയത് 40-50 വിമാനങ്ങളെങ്കിലും ഓരോ ഞായറാഴ്ചയും ഗുരുദ്വാരയില് കിട്ടുന്നുണ്ട്. ചില ഭക്തര് തങ്ങള് പോകാനാഗ്രഹിക്കുന്ന രാജ്യങ്ങളിലുള്ള വിമാനങ്ങളുടെ മാതൃകയാണത്രേ കൊണ്ടുവരുന്നത്.