സ്ത്രീധനം വില്ലനായി; വധൂവരന്മാര് ഒളിച്ചോടി
കല്ലറ: വിവാഹം നിശ്ചയിച്ച വധുവും വരനും ഒളിച്ചോടി വിവാഹം ചെയ്യുക ഇങ്ങനെയൊന്ന് സംഭവിക്കാന് എന്തെങ്കിലും സാധ്യതയുണ്ടോ. വധുവും വരനും എന്തിന് ഒളിച്ചോടണം കാരണവന്മാര് അവരുടെ വിവാഹം നടത്തിക്കൊടുക്കില്ലേയെന്ന ചോദ്യമല്ലേ ഉള്ളില്വന്നത്.
എന്നാല് ഒരു വധുവും വരനും ഒളിച്ചോടി. കല്ലറ പാങ്ങോട് സ്വദേശിനിയായ വധുവും, തിരുവനന്തപുരം പാപ്പനം കോടി സ്വദേശിയായ വരനുമാണ് ഒളിച്ചോടി വിവാഹം ചെയ്തത്. പെണ്ണുകാണല്ച്ചടങ്ങ് കഴിഞ്ഞ് സ്ത്രീധനത്തുകയില് ധാരണയിലെത്തി ബന്ധുക്കള്ത്തന്നെയാണ് ഇവരുടെ വിവാഹം ഉറപ്പിച്ചത്.
എന്നാല് പറഞ്ഞുറപ്പിച്ച സ്ത്രീധനത്തുക തങ്ങളാവശ്യപ്പെടുമ്പോള് താരാന്വധുവിന്റെ വീട്ടുകാര്ക്ക് കഴിയില്ലെന്ന് ഉറപ്പായതോടെ വരന്റെ വീട്ടുകാര് കല്യാണം മാറ്റിവയ്ക്കാന് തീരുമാനിച്ചു. ഇതിനെത്തുടര്ന്നാണ് വധുവും വരനും ഒളിച്ചോടിയത്. എന്തായാലും സ്ത്രീധനത്തിന്റെ പേരില് വിവാഹം നിര്ത്തിവയ്ക്കാന് തീരുമാനിച്ച ബന്ധുക്കള്ക്ക് അസ്സലൊരു ഷോക്ക് നല്കിയാണ് വധുവും വരനും ഈ ഒളിച്ചോടല് സാഹസം കാണിച്ചത്.
വിവാഹനിശ്ചയം കഴിഞ്ഞ സമയത്ത് വധുവിന്റെ വീട്ടുകാര് ഒരു ലക്ഷം രൂപയും ഒരു റാഡോ വാച്ചും അഡ്വാന്സായി വരന് നല്കിയിരുന്നുവത്രേ. കരാര് അനുസരിച്ച് ബാക്കി മൂന്നു ലക്ഷം രൂപകൂടി നല്കേണ്ടിയിരുന്നു. രൂപ വിവാഹത്തിന് ശേഷം നല്കാമെന്നും വധുവിന് 30പവന്റെ സ്വര്ണം നല്കാമെന്നുമായിരുന്നു വ്യവസ്ഥ.
എന്നാല് തീരുമാനിച്ചതില് നിന്നും വിരുദ്ധമായി വരന്റെ വീട്ടുകാര് വിവാഹത്തിന് മുമ്പേ മൂന്നുലക്ഷം രൂപ ആവശ്യപ്പെട്ടു. ഇത് നല്കാന് കഴിയില്ലെന്ന് വധുവിന്റെ പിതാവ് വ്യക്തമാക്കി. എന്നാല് വിവാഹനിശ്ചയം കഴിഞ്ഞതില്പ്പിന്നെ വധുവും വരനും മൊബൈല് വഴി ബന്ധപ്പെടുകയും പരസ്പരം ഏറെ അടുക്കുകയും ചെയ്തിരുന്നു.
രക്ഷാകര്ത്താക്കള് ഒരു ഭാഗത്ത് സ്ത്രീധനത്തിന്റെ പേരില് വാശികാണിയ്ക്കുകയും പിടിവലി കൂടുകയുംചെയ്യുമ്പോള് ഇവര് ഒളിച്ചോടിയാണെങ്കിലും വിവാഹിതരാകാന് തീരുമാനിക്കുകയായിരുന്നു. എന്തായാലും ഒളിച്ചോടിയ ഇരുവരെയും തിരികെ കൊണ്ടുവന്ന ബന്ധുക്കള് പാങ്ങോട് പുത്തന്പള്ളിയില്വച്ച് മാതചാരപ്രകാരം വിവാഹം കഴിപ്പിച്ചു.