വിഎസിനെ അഭിനന്ദിച്ച്‌ അമ്പലപ്പുഴയില്‍ പോസ്‌റ്റര്‍

അമ്പലപ്പുഴ: ലാവലിന്‍ കേസുമായി ബന്ധപ്പെട്ട്‌ ദില്ലിയിലും കോട്ടയത്തും പിണറായിയ്‌ക്കെതിരെ പോസ്‌റ്ററുകള്‍ പ്രത്യക്ഷപ്പെട്ടതിന്‌ പിന്നാലെ വിഎസ്‌ അച്യുതാനന്ദനെ അഭിനന്ദിച്ചുകൊണ്ടും പോസ്‌റ്ററുകള്‍.

അമ്പലപ്പുഴയില്‍ ദേശീയ പാതയ്‌ക്കരികിലാണ്‌ വിഎസിനെ അഭിനന്ദിച്ചുകൊണ്ട്‌ കൂറ്റന്‍ ഫ്‌ളക്‌സ്‌ ബോര്‍ഡുകള്‍ ഉയര്‍ന്നിരിക്കുന്നത്‌. പുറക്കാട്‌ ഐടി പാര്‍ക്ക്‌ അനുവദിച്ച വിഎസ്‌ സര്‍ക്കാറിന്‌ അഭിനന്ദനങ്ങള്‍ എന്നെഴുതിയ ബോര്‍ഡുകള്‍ ശനിയാഴ്‌ച രാവിലെയാണ്‌ കണ്ടത്‌.

വളഞ്ഞവഴി, അമ്പലപ്പുള, തോട്ടപ്പള്ളി, പുറക്കാട്‌ എന്നിവിടങ്ങളിലാണ്‌ പോസ്‌റ്റര്‍ സ്ഥാപിച്ചിരിക്കുന്നത്‌. ഐടി പാര്‍ക്ക്‌ അനുവദിച്ചുകൊണ്ട്‌ വിഎസ്‌ പ്രഖ്യാപനം നടത്തിയിട്ട്‌ മാസങ്ങള്‍ കഴിഞ്ഞു. അക്കാര്യം പറഞ്ഞുകൊണ്ട്‌ ഇപ്പോള്‍ അദ്ദേഹത്തെ അഭിനന്ദിച്ച്‌ പോസ്‌റ്റര്‍ ഉയര്‍ന്നത്‌ ചര്‍ച്ചയായിരിക്കുകയാണ്‌.

കഴിഞ്ഞ ദിവസം അമ്പലപ്പുഴ വടക്ക്‌ പഞ്ചായത്ത്‌ ഒന്നാം വാര്‍ഡിയെ ഉപതിരഞ്ഞെടുപ്പില്‍ വിഎസ്‌ പക്ഷക്കാരനായിരുന്ന വിമതന്‍ വിജയം നേടിയതിന്റെ പരസ്യപ്രകടനമാണ്‌ ഇതെന്നാണ്‌ വിലയിരുത്തപ്പെടുന്നത്‌. സാധാരണ ഇത്തരം ബോര്‍ഡുകള്‍ സ്ഥാപിക്കുമ്പോള്‍ ബന്ധപ്പെട്ട പാര്‍ട്ടി ഘടകത്തിന്റെ പേര്‌ രേഖപ്പെടുത്താറുണ്ട്‌. എന്നാല്‍ ഈ പോസ്‌റ്ററുകളില്‍ ഇത്‌ വ്യക്തമാക്കിയിട്ടില്ല.

ലാവലിന്‍ കേസില്‍ പിണറായി പ്രതിയായിരിക്കേ വിഎസിന്റെ മുഖഛായ മെച്ചപ്പെടുത്താനായി അദ്ദേഹത്തിന്റെ പക്ഷക്കാര്‍ നടത്തുന്ന കരുനീക്കങ്ങളുടെ ഭാഗമായിരിക്കാം ഇതെന്നും കരുതപ്പെടുന്നുണ്ട്‌.