ഐബിഎം 2800 പേരെ പിരിച്ചുവിട്ടു

ന്യൂയോര്‍ക്ക്‌: പ്രമുഖ ഐടി കമ്പനിയായ ഐബിഎം(ഇന്റര്‍നാഷണല്‍ ബിസിനസ്‌ മെഷിന്‍സ്‌) 2,800 ജീവനക്കാരെ പിരിച്ചുവിട്ടു. കഴിഞ്ഞയാഴ്‌ചയാണ്‌ ചെലവു ചുരുക്കലിന്റെ ഭാഗമായി ഇത്രയും ജീവനക്കാരെ കമ്പനി പിരിച്ചുവിട്ടത്‌.

സെയില്‍സ്‌, ഡിസ്‌ട്രിബ്യൂഷന്‍, സോഫ്‌റ്റ്‌ വേര്‍ എന്നീ വിഭാഗങ്ങളില്‍ നിന്നുള്ള ജീവനക്കാര്‍ക്കാണ്‌ തൊഴില്‍ നഷ്ടമായത്‌. കമ്പനിയില്‍ നിന്നുള്ള റിപ്പോര്‍ട്ട്‌ പ്രകാരം സോഫ്‌റ്റ്‌വേര്‍ വിഭാഗത്തില്‍ നിന്നും 1,419 ജോലിക്കാരെയും സെയില്‍സ്‌, ഡിസ്‌ട്രീബ്യൂഷന്‍ എന്നീ വിഭാഗങ്ങളില്‍ നിന്നായി 1449 ജീവനക്കാരെയുമാണ്‌ പിരിച്ചുവിട്ടത്‌.

ഐടി മേഖലയിലെ ഭീമന്മാരായ മൈക്രോസോഫ്‌റ്റും ഐബിഎമ്മുംവരെ ചെലവുചുരുക്കാനും സാമ്പത്തിക പ്രതിസന്ധിയെ നേരിടാനുമായി തൊഴിലുകള്‍ വെട്ടിയ്‌ക്കുറയ്‌ക്കുന്നത്‌ ഉദ്യോഗാര്‍ത്ഥികള്‍ക്കിടയില്‍ ഭീതിപരത്തുകയാണ്‌.

ഇതിനിടെ ഇപ്പോഴത്തെ പ്രതിസന്ധി 2009ലുടനീളമുണ്ടാകുമെന്നും സാമ്പത്തിക വിദഗ്‌ധരുടെ വിലയിരുത്തലുകളുണ്ട്‌. മൈക്രോസോഫ്‌റ്റ്‌ 5000 ജീവനക്കാരെ പിരിച്ചുവിടുമെന്ന്‌ പ്രഖ്യാപിച്ചുകഴിഞ്ഞു. ഡെല്‍ ഇന്‍ക്‌ ഐര്‍ലണ്ടിലെ സ്ഥാപനത്തില്‍ നിന്നും 1900 ജീവനക്കാരെ പിരിച്ചുവിട്ടിട്ടുണ്ട്‌.