ചികിത്സയ്ക്ക് അനുമതി തേടി പൂതൃക്കയിലിന്റെ ഹര്‍ജി

കൊച്ചി: അഭയ കേസില്‍ രണ്ടാം പ്രതിയായ ഫാദര്‍ ജോസ് പൂതൃക്കയില്‍ ചികിത്സയ്ക്ക് അനുമതി തേടിക്കൊണ്ട് സിജെഎം കോടതിയില്‍ ഹര്‍ജി സമര്‍പ്പിച്ചു.

ചികിത്സയ്ക്കായി ആശുപത്രിയില്‍ പ്രവേശിപ്പിയ്ക്കാന്‍ അനുമതി വേണമെന്നാവശ്യപ്പെട്ടുള്ള ഹര്‍ജി ഫെബ്രുവരി രണ്ടിന് പരിഗണിയ്ക്കാനായി മാറ്റിവെച്ചു. ഇത് സംബന്ധിച്ചുള്ള മെഡിക്കല്‍ റിപ്പോര്‍ട്ടുകള്‍ പൂതൃക്കയിലനിനോട് ഹാജരാക്കാന്‍ എറണാകുളം ചീഫ്‌ ജുഡീഷ്യല്‍ മജിസ്ട്രേറ്റ്‌ പി.ഡി സോമന്‍ നിര്‍ദേശിച്ചു.

നടുവേദനയെത്തുടര്‍ന്നു ആയുര്‍വേദ ചികിത്സ ആവശ്യമാണെന്നാണ് പ്രതി ഹര്‍ജിയില്‍ ആവശ്യപ്പെട്ടിരിയ്ക്കുന്നത്.

അതിനിടെ അഭയയുടെ ആന്തരാവയവങ്ങളുടെ ഫോറന്‍സിക്‌ പരിശോധന നടത്തിയ ഡോക്ടര്‍ ഉമാദത്തന്‍ ശനിയാഴ്ച സി.ബി.ഐയുടെ കൊച്ചി ആസ്ഥാനത്തെത്താന്‍ നിര്‍ദേശിച്ചിട്ടുണ്ട്‌. ക്രൈംബ്രാഞ്ച്‌ എസ്‌പിയായിരുന്ന കെടി മൈക്കിളിനെ ചൊവ്വാഴ്ച വീണ്ടും ചോദ്യം ചെയ്യുമെന്ന് സൂചനകളുണ്ട്.