കുംബ്ലെയെക്കാത്ത് ബിജെപി, സര്ക്കാറിനായി ശിവസേന
ദില്ലി: കളമൊഴിഞ്ഞ ക്രിക്കറ്റ് താരങ്ങളെല്ലാം രാഷ്ട്രീയത്തില് ചേക്കേറുകയാണോ? അല്ലെങ്കില് രാഷ്ട്രീയപാര്ട്ടികളെല്ലാം ഇവരുടെ ജനസമ്മതിയെ ചൂഷണം ചെയ്യാനായി ലോക്സഭാ തിരഞ്ഞെടുപ്പില് ടിക്കറ്റ് നല്കാമെന്നും പറഞ്ഞ് പിന്നാലെ ചെല്ലുകയാണോ.
എന്താണ് സംഭവിക്കുന്നതെന്ന് വ്യക്തമല്ലെങ്കിലും മുന് ഇന്ത്യന് ക്യാപ്റ്റന് അസ്ഹറുദ്ദീനെ കളത്തിലിറക്കാന് കോണ്ഗ്രസും, അടുത്തിടെ വിരമിച്ച സ്പിന്നര് അനില് കുംബ്ലെയെ സ്ഥാനാര്ത്ഥിയാക്കാന് ബിജെപിയും ചരടുവലികള് നടത്തുകയാണ്.
അനില് കുംബ്ലെയെ ലോക് സഭാ തിരഞ്ഞെടുപ്പില് സ്ഥാനാര്ത്ഥിയാക്കാന് തയ്യാറാണെന്ന് കര്ണാടകത്തിലെ ബിജെപി നേതൃത്വം വ്യക്തമാക്കിക്കഴിഞ്ഞു. മുന് ക്യാപ്റ്റന് വെങ് സര്ക്കാറിനെ ആകര്ഷിക്കാന് ശിവ സേനയും തയ്യാറെടുക്കുന്നതായി റിപ്പോര്ട്ടുകളുണ്ട്.
വെങ് സര്ക്കാര് കഴിഞ്ഞ ദിവസം ശിവ സേന നേതാവ് ഉദ്ധവ് താക്കറെയുമായി നടത്തിയ സന്ദര്ശനമാണ് ഈ വാര്ത്തകള്ക്ക് കരുത്തേകുന്നത്. വടക്കന് മുംബൈയില് മത്സരിപ്പിക്കണമെന്നാവശ്യപ്പെട്ടാണ് സര്ക്കാര് ഉദ്ധവിനെ കണ്ടതെന്നാണ് റിപ്പോര്ട്ടുകള് സൂചിപ്പിക്കുന്നത്.
ഇദ്ദേഹത്തിന്റെ ആവശ്യം പാര്ട്ടി അംഗീകരിച്ചിട്ടുണ്ടെന്നും റിപ്പോര്ട്ടുകള് വ്യക്തമാക്കുന്നു. എന്നാല് ഇതുസംബന്ധിച്ച് ഔദ്യോഗിക പ്രഖ്യാപനങ്ങളൊന്നും പുറത്തുവന്നിട്ടില്ല.ബാംഗ്ലൂര് നോര്ത്ത് സീറ്റില് കുംബ്ലെയെ മത്സരിപ്പിക്കാനാണ് ബിജെപി ആഗ്രഹിക്കുന്നത്.