നവ കേരളയാത്രയ്‌ക്കുനേരെ പാര്‍ട്ടി പ്രവര്‍ത്തകന്റെ ചെരുപ്പേറ്‌

പയ്യന്നൂര്‍: സിപിഎം സംസ്ഥാന സെക്രട്ടറി പിണറായി വിജയന്‍ നയിക്കുന്ന നവകേരള മാര്‍ച്ചിന്‌ നേരെ ചെരുപ്പേറ്‌. പയ്യന്നൂരിലെ തിരുമേനിയിലുള്ള സജീവ സിപിഎം പ്രവര്‍ത്തകനായ ഷാജി എന്ന ഷൈനു(29) ആണ്‌ മാര്‍ച്ചിനുനേരെ ചെരുപ്പെറിഞ്ഞത്‌.

സംഭവത്തെത്തുടര്‍ന്ന്‌ മറ്റു പാര്‍ട്ടി പ്രവര്‍ത്തകരുടെ മര്‍ദ്ദനമേറ്റ ഇയാള്‍ പരിയാരം മെഡിക്കല്‍ കോളെജ്‌ ആശുപത്രിയില്‍ തീവ്രപരിചരണ വിഭാഗത്തിലാണ്‌.

ജില്ലാ അതിര്‍ത്തിയായ ഒളവറപ്പാലത്തില്‍ ജില്ലാനേതാക്കള്‍ സ്വീകരിച്ചശേഷം പയ്യന്നൂര്‍ സെന്‍ട്രല്‍ ബസാറിലെ റെഡ്‌ വളണ്ടിയര്‍മാര്‍ ഒരുക്കിയ ഗാര്‍ഡ്‌ ഓഫ്‌ ഓണര്‍ വീക്ഷിച്ച്‌ പിണറായി വിജയനും നേതാക്കളും സമ്മേളന നഗരിയിലേയ്‌ക്ക്‌ നടന്നുപോകുന്നതിനിടെയാണ്‌ ചെരുപ്പേറുണ്ടായത്‌.

സഖാവ്‌ വിഎസ്‌ സിന്ദാബാദ്‌ എന്ന്‌ വിളിച്ചുപറഞ്ഞുകൊണ്ട്‌ പിണറായിയെ ലക്ഷ്യം വച്ചാണ്‌ ചെരുപ്പെറിഞ്ഞത്‌. എന്നാല്‍ ചെരുപ്പ്‌ പിണറായിയുടെ ദേഹത്ത്‌ കണ്ടില്ല.

ഷൈനു മദ്യപിച്ചിരുന്നതായി ആശുപത്രി അധികൃതരും പൊലീസും അറിയിച്ചു. മദ്യപിച്ച്‌ ജാഥ അലങ്കോലപ്പെടുത്താന്‍ ശ്രമിച്ചതിന്‌ പൊലീസ്‌ ഷാജിയ്‌ക്കെതിരെ കേസെടുത്തിട്ടുണ്ട്‌. ഷാജി ഇതിന്‌ മുമ്പും മാനസികവിഭ്രാന്തി കാട്ടിയിരുന്നതായി പാര്‍ട്ടി പ്രവര്‍ത്തകര്‍ പറഞ്ഞു. ജാഥയ്‌ക്ക്‌ മുമ്പുള്ള ഒരുക്കങ്ങള്‍ നടത്താനായി ഇയാള്‍ കൂടെയുണ്ടായിരുന്നുവെന്നും പ്രവര്‍ത്തകര്‍ പറയുന്നു.