ലാവലിന് കേസിലെ പ്രോസിക്യൂഷന്: നിയമോപദേശം തേടിയെന്ന് വിഎസ്
തിരുവനന്തപുരം: ലാവലിന് കേസില് പിണറായി വിജയനെ പ്രോസിക്യൂട്ട് ചെയ്യാന് അനുമതി നല്കുന്നത് സംബന്ധിച്ച് തീരുമാനമെടുക്കുന്നതിന് അഡ്വക്കേറ്റ് ജനറലിനോട് നിയമോപദേശം തേടിയിട്ടുണ്ടെന്ന് മുഖ്യമന്ത്രി വി.എസ് അച്യുതാനന്ദന് അറിയിച്ചു. ബുധനാഴ്ച മന്ത്രിസഭായോഗത്തിനുശേഷം മാധ്യമപ്രവര്ത്തകരോട് സംസാരിക്കവേയാണ് വിഎസ് ഇക്കാര്യം അറിയിച്ചത്.
ഇത്ര ദിവസത്തിനകം അഭിപ്രായം അറിയിക്കണമെന്ന് അഡ്വക്കേറ്റ് ജനറലിന് നിര്ദ്ദേശം നല്കിയിട്ടുണ്ടോയെന്ന് ചോദിച്ചപ്പോള് കാലാവധി നിശ്ചയിച്ചിട്ടില്ലെന്നും തീരുമാനം നീണ്ടാല് ആ കാര്യം മാധ്യമങ്ങളെ അറിയിക്കാമെന്നും മുഖ്യമന്ത്രി പറഞ്ഞു.
പിണറായി വിജയന് സിപിഎം സെക്രട്ടറി സ്ഥാനം രാജിവെച്ചാല് പ്രശ്നം തീരുമോയെന്ന ചോദ്യത്തിന് അതൊന്നും നിങ്ങളുമായി ചര്ച്ച ചെയ്യാന് ഉദ്ദേശിക്കുന്നില്ലെന്നായിരുന്നു വിഎസിന്റെ മറുപടി.
സിപിഎമ്മിലുള്ളവര് നവകേരളയാത്രയിലുണ്ട് എന്ന പിണറായിയുടെ അഭിപ്രായത്തെക്കുറിച്ചുള്ള ചോദ്യത്തിന് അതൊക്കെ സംബന്ധിച്ച് താന് പറഞ്ഞതെല്ലാം പത്രങ്ങളില് വന്നിട്ടുണ്ട് അവ വായിക്കാനായിരുന്നു വിഎസിന്റെ നിര്ദേശം. മാത്രമല്ല ഇപ്പോഴും ഇത്തരം ചോദ്യം ചോദിച്ചുകൊണ്ടിരുന്നാല് എപ്പോഴും മറുപടി നല്കാനാവുമോയെന്നും വിഎസ് ചോദിച്ചു.
ലാവലിന് കേസില് പ്രോസിക്യൂഷന് അനുമതി തേടി ഗവര്ണറുടെ കത്ത് ലഭിച്ച കാര്യം മുഖ്യമന്ത്രി വി.എസ് അച്യുതാനന്ദന്തന്നെയാണ് മന്ത്രിസഭായോഗത്തിന്റെ പരിഗണനയ്ക്ക് വെച്ചത്.
ഇതു സംബന്ധിച്ച് അഡ്വക്കേറ്റ് ജനറലിനോട് നിയമോപദേശം തേടാനാണ് തന്റെ തീരുമാനമെന്ന് മുഖ്യമന്ത്രി പറഞ്ഞപ്പോള് മന്ത്രി കോടിയേരി ബാലകൃഷ്ണന് പിന്താങ്ങി. തുടര്ന്ന് സിപിഎം മന്ത്രിമാര് ഓരോരുത്തരും എ.ജിയോട് അഭിപ്രായം തേടാനുള്ള തീരുമാനത്തെ പിന്തുണയ്ക്കുകയായിരുന്നു.