ഐബിഎമ്മുകാര്ക്ക് ഇന്ത്യയോ ചൈനയോ തിരഞ്ഞെടുക്കാം
ന്യൂയോര്ക്: സാമ്പത്തിക മാന്ദ്യത്തെത്തുടര്ന്ന് പിരിച്ചുവിടല് ഭീഷണി നേരിടുന്ന ഐബിഎം ജീവനക്കാര്ക്ക് ആശ്വാസത്തിന് വക. കമ്പനിയില്ത്തന്നെ തുടരണമെന്നുള്ളവര്ക്ക് ഇന്ത്യയുള്പ്പെടെ ജീവിതച്ചെലവ് കുറഞ്ഞ രാജ്യങ്ങളിലെ ഐബിഎം ഓഫീസുകളിലേയ്ക്ക് സ്ഥലം മാറ്റം വാങ്ങിപ്പോകാമെന്നതാണ് കമ്പനി മുന്നോട്ടുവച്ചിരിക്കുന്ന നിര്ദ്ദേശം.
യൂറോപ്പിലും അമേരിക്കയിലുമുള്ള ഓഫീസുകളില് നിന്നും ആയിരക്കണക്കിന് ജീവനക്കാരെയാണ് ഐബിഎം പിരിച്ചുവിട്ടിരിക്കുന്നത്. ഈ അവസ്ഥയില്ത്തന്നെ തങ്ങളുടെ രക്ഷയ്ക്കായി ഇത്തരത്തിലൊരു ഓഫര് മുന്നോട്ടുവച്ചതിനെ ജീവനക്കാര് സ്വാഗതം ചെയ്യുന്നുണ്ട്.
പ്രൊജക്ട് മാച്ച് എന്നപേരിലാണ് കമ്പനി ഈ പദ്ധതി പ്രഖ്യാപച്ചിരിക്കുന്നത്. പദ്ധതിയെക്കുറിച്ച് കൂടുതലൊന്നും വെളിപ്പെടുത്താന് അധികൃതര് തയ്യാറായിട്ടില്ല.
ഇന്ത്യ, ചൈന, ബ്രസീല് തുടങ്ങിയ ചുരുങ്ങിയ ചെലവില് ജീവിക്കാന് സാധിയ്ക്കുന്ന രാജ്യങ്ങളെക്കുറിച്ചും അവിടത്തെ ജോലിസാധ്യതകളെക്കുറിച്ചും ജീവനക്കാരെ അറിയിച്ചിട്ടുണ്ടെന്ന് അധികൃതര് പറയുന്നു.
എന്തായാലും വിദേശികളായ ജോലിക്കാര് മിക്കവരും ഐബിഎമ്മിന്റെ ബാംഗ്ലൂരിലുള്ള ഓഫീസുകള് തന്നെയായിരിക്കും കൂടുതലായും തിരഞ്ഞെടുക്കുകയെന്നാണ് കരുതപ്പെടുന്നത്.
ഇത്തരത്തില് പോകാന് തയ്യാറാകുന്നവര്ക്ക് ഇമിഗ്രേഷന് സൗകര്യങ്ങളും വിസയ്ക്കുള്ള സഹായവും കമ്പനി ചെയ്തുകൊടുക്കും. ജനുവരിയില് അമേരിക്കയില് മാത്രം ഐബിഎം 4,000ത്തോളം ജീവനക്കാരെ പിരിച്ചുവിട്ടിട്ടുണ്ട്.