അഭയ: ഡോക്ടര്‍ മാലിനിയില്‍ നിന്നും മൊഴിയെടുത്തു

ബാംഗ്ലൂര്‍: സിസ്റ്റര്‍ അഭയ കേസിലെ പ്രതികളായ വൈദികരുടെയും കന്യാസ്‌ത്രീയുടെയും നാര്‍കോ അനാലിസിസ്‌ സിഡി തയ്യാറാക്കിയ ഫൊറന്‍സിക്‌ ലാബ്‌ അസിസ്റ്റന്റ്‌ ഡയറക്‌ടര്‍ ഡോക്ടര്‍ മാലിനിയില്‍നിന്നും സിബിഐ സംഘം മൊഴിയെടുത്തു.

ഡിവൈഎസ്‌പി നന്ദകുമാരന്‍ നായരുടെ നേതൃത്വത്തിലുള്ള സംഘം ഡയറക്ടര്‍ ഡോക്ടര്‍ ബി.എം മോഹനുമായും സാങ്കേതിക വിഭാഗം ഉദ്യോഗസ്ഥരുമായും സംസാരിച്ചു. ഉച്ചയ്‌ക്കു ഒരുമണിയോടെയാണ്‌ സംഘം മഡിവാളയിലുള്ള ലാബിലെത്തിയത്‌. രാത്രി വൈകിയും പരിശോധനയും മൊഴിയെടുക്കലും തുടര്‍ന്നു.

കേസിലെ പ്രതികളായ ഫാദര്‍ തോമസ്‌ കോട്ടൂര്‍, ജോസ്‌ പൂതൃക്കയില്‍, സിസ്റ്റര്‍ സെഫി എന്നിവരുടെ നാര്‍കോ അനാലിസിസ്‌ സിഡിയില്‍ കൃത്രിമം നടന്നെന്ന ആരോപണത്തിന്റെ പശ്ചാത്തലത്തിലാണ്‌ തെളിവെടുപ്പ്‌ നടത്തിയത്‌.

ലാബ്‌ നല്‍കിയ സിഡി യഥാര്‍ത്ഥമാണോ, മാസ്‌റ്റര്‍ സിഡികള്‍തന്നെയാണോ കോടതിയില്‍ ഹാജരാക്കിയത്‌, സിഡി തയ്യാറാക്കിയത്‌ എങ്ങിനെ തുടങ്ങിയ കാര്യങ്ങളാണ്‌ സിബിഐ പ്രധാനമായും അന്വേഷിച്ചത്‌. എന്നാല്‍ ഇതുസംബന്ധിച്ച്‌ സിബിഐയോ ലാബ്‌ അധികൃതരോ കൂടുതലൊന്നും വെളിപ്പെടുത്തിയിട്ടില്ല.