ശ്രീരാം സേന താലിബാനിസം വളര്‍ത്താന്‍ ശ്രമിക്കുന്നു: രേണുക

ദില്ലി: ശ്രീരാമ സേനയുടെ ധാര്‍മിക പൊലീസ്‌ ചമയലിനെതിരെ കേന്ദ്രവനിതാ ശിശുക്ഷേമമന്ത്രി രേണുകാ ചൗധരി വീണ്ടും രംഗത്ത്‌. മഞ്ചേശ്വരം എംഎല്‍എയുടെ മകള്‍ക്കുനേരെയുണ്ടായ അക്രമത്തെ മന്ത്രി അപലപിച്ചു.

സേന താലിബാനിസം കൊണ്ടുവരാനുള്ള ശ്രമമാണ്‌ നടത്തുന്നതെന്നും ഇതിനെ തടയാന്‍ സംസ്ഥാന സര്‍ക്കാര്‍ തയ്യാറാകണമെന്നും രേണുക ആവശ്യപ്പെട്ടു. രാജ്യത്തെ നിയമത്തെ വെല്ലുവിളിക്കുകയാണ്‌ ഇവര്‍ ചെയ്യുന്നത്‌.

ഇന്നലെ പബില്‍ സംഭവിച്ചു ഇന്ന്‌ ബസിലും നാളെ നിങ്ങളുടെ വീട്ടുമുറ്റത്തും ഇത്തരം സംഭവങ്ങള്‍ ആവര്‍ത്തിക്കപ്പെടാം. ഇത്‌ ഫാസിസമാണ്‌. രാജ്യത്തെ വര്‍ഗീയമായി വിഭജിക്കാനുള്ള ശ്രമമാണ്‌ ഇപ്പോള്‍ നടക്കുന്നത്‌. ഇത്‌ നിയമവാഴ്‌ചയോടുള്ള വെല്ലുവിളിയാണെന്നും മന്ത്രി പറഞ്ഞു.

ഇതിനിടെ എംഎല്‍എയുടെ മകള്‍ക്കെതിരെയുണ്ടായ അക്രമത്തെ ബിജെപിയും അപലപിച്ചിട്ടുണ്ട്‌. അക്രമികള്‍ക്കെതിരെ നടപടിയെടുക്കണമെന്നും ബിജെപി ആവശ്യപ്പെട്ടിട്ടുണ്ട്‌. സംഭവത്തെ ഹീനകൃത്യമെന്നാണ്‌ പാര്‍ട്ടി വിശേഷിപ്പിച്ചത്‌.

കുറച്ചുനാള്‍മുമ്പ്‌ മംഗലാപുരത്തെ പബില്‍ പെണ്‍കുട്ടികള്‍ ആക്രമിക്കപ്പെട്ട സംഭവംത്തെ ബിജെപി നേതാവ്‌ രാജ്‌നാഥ്‌ സിങ്‌ അപലപിച്ചിരുന്നുവെങ്കിലും ശ്രീരാമസേനയെ പേരെടുത്ത്‌ വിമര്‍ശിക്കാന്‍ അദ്ദേഹം തയ്യാറായിരുന്നില്ല.