അസംബന്ധങ്ങള്‍ എവിടെ നിന്ന്‌ കിട്ടുന്നു? പിണറായി

തിരൂര്‍: മാധ്യമങ്ങള്‍ നവകേരള മാര്‍ച്ചിനെക്കുറിച്ച്‌ നടത്തുന്ന പ്രചാരണങ്ങള്‍ ശുദ്ധ അസംബന്ധങ്ങളാണെന്ന്‌ സിപിഎം സംസ്ഥാന സെക്രട്ടറി പിണറായി വിജയന്‍. അസംബന്ധം പ്രചരിപ്പിയ്‌ക്കാനുള്ള ലൈസന്‍സല്ല മാധ്യമ പ്രവര്‍ത്തനമെന്നും തിരൂരില്‍ മാധ്യമപ്രവര്‍ത്തകരോട്‌ സംസാരിക്കവെ അദ്ദേഹം പറഞ്ഞു.

നവകേരള മാര്‍ച്ചിന്റെ സ്വീകരണ പരിപാടികളില്‍ മഞ്ഞളാംകുഴി അലി എംഎല്‍എ വിട്ടുനില്‌ക്കുന്നതായുള്ള ഒരു മാധ്യമ പ്രവര്‍ത്തകന്റെ ചോദ്യമാണ്‌ പിണറായിയെ പ്രകോപിപ്പിച്ചത്‌. തുടര്‍ന്ന്‌ മാധ്യമ പ്രവര്‍ത്തകരും പിണറായിയും നേരിയ തോതില്‍ തര്‍ക്കവും ഉണ്ടായി.

ജാഥ ആരംഭിച്ചപ്പോള്‍ തന്നെ മാധ്യമ പ്രവര്‍ത്തകരെ ആക്ഷേപിക്കുന്നതായി ആരോപണം ഉയര്‍ന്നപ്പോള്‍ ഇ. ബാലാനന്ദന്റെ കത്തും മാര്‍ച്ചിനെപ്പറ്റിയുള്ള മറ്റ്‌ വാര്‍ത്തകളും ചൂണ്ടക്കാട്ടി ഇത്തരം വാര്‍ത്തകള്‍ എവിടെ നിന്ന്‌ കിട്ടുന്നുവെന്ന്‌ പിണറായി ചോദിച്ചു. ശുദ്ധ അസംബന്ധങ്ങളാണ്‌ പത്രങ്ങള്‍ എഴുതിക്കൂട്ടുന്നതെന്നും പാര്‍ട്ടി ഇതിനെ അംഗീകരിയ്‌ക്കുന്നില്ലെന്നും അദ്ദേഹം പറഞ്ഞു.

സിബിഐ അന്വേഷണം വേണ്ടെന്ന്‌ സിപിഎം പറഞ്ഞിട്ടില്ലെന്ന്‌ പിണറായി വ്യക്തമാക്കി. ചില കേസുകള്‍ സിബിഐ അന്വേഷിക്കേണ്ടി വരും. സിബിഐ വിശ്വാസ്യത വീണ്ടെടുക്കണമെന്നും അദ്ദേഹം ആവശ്യപ്പെട്ടു.