വിഎസ്‌ ഒറ്റയാന്‍ പോരാട്ടം നടത്തിയിട്ടില്ലെന്ന്‌ പിണറായി

ആലുവ: ലാവലിന്‍ പ്രശ്‌നത്തില്‍ പൊളിറ്റ്‌ ബ്യൂറോയുടെ പൂര്‍ണ പിന്തുണയുമായി സംസ്ഥാനത്ത്‌ തിരിച്ചെത്തിയ പിണറായി വിജയന്‍ വിഎസ്‌‌ അച്യുതാനന്ദന്റെ കാര്യത്തില്‍ തന്ത്രപരമായ നിലപാട്‌ സ്വീകരിക്കുന്നു.

സാധാരണത്തേതില്‍ നിന്നും വ്യത്യസ്‌തമായി വിഎസിന്റെ നിലപാടുകളെ ന്യായീകരിക്കുന്ന തരത്തിലാണ്‌ നവകേരള മാര്‍ച്ചിന്റെ ഭാഗമായി ആലുവയില്‍ എത്തിയ പിണറായി സംസാരിച്ചത്‌. അഴിമതിക്കെതിരെ മുഖ്യമന്ത്രി വിഎസ്‌ അച്യുതാനന്ദന്‍ നടത്തിയ പോരാട്ടങ്ങളെല്ലാം പാര്‍ട്ടി തീരുമാനങ്ങള്‍ ആയിരുന്നുവെന്ന്‌ അദ്ദേഹം പറഞ്ഞു.

വിഎസ്‌ ഒറ്റയാന്‍ സമരം നടത്തിയെന്ന്‌ ആരോപിക്കാന്‍ കഴിയില്ല. പാര്‍ട്ടി തീരുമാനത്തിന്റെ ഭാഗമായി അദ്ദേഹം ചില നിലപാടുകള്‍ എടുക്കുകയാണ്‌ ചെയ്‌തത്‌. ഈ പാര്‍ട്ടിയില്‍ത്തന്നെയാണ്‌ ഞങ്ങള്‍ രണ്ടുപേരും നില്‍ക്കുന്നത്‌. പ്രതിപക്ഷനേതാവ്‌, പാര്‍ട്ടി നേതാവ്‌ എന്നീ നിലകളില്‍ അദ്ദേഹം ചില നിലപാടുകള്‍ സ്വീകരിച്ചിട്ടുണ്ട്‌. അദ്ദേഹത്തെ നിയോഗിച്ചിരിക്കുന്നത്‌ അതിനുവേണ്ടിയാണ്‌.

അഴിമതിയ്‌ക്കെതിരെ പോരാട്ടം തുടരുമെന്ന വിഎസിന്റെ പ്രസ്‌താവനയെക്കുറിച്ച്‌ മാധ്യമപ്രവര്‍ത്തകര്‍ ചോദിച്ചപ്പോഴാണ്‌ പിണറായി ഇങ്ങനെ പറഞ്ഞത്‌.

ലാവലിന്‍ കരാര്‍ ഒപ്പിട്ടത്‌ പാര്‍ട്ടി തീരുമാനം അനുസരിച്ചായിരുന്നുവെങ്കില്‍ ഉദ്യോഗസ്ഥരെ എന്തിന്‌ ബലിയാടാക്കി എന്ന ചോദ്യത്തിന്‌ ലാവലിന്‍ കേസില്‍ താന്‍ കൂടുതലൊന്നും പറയില്ലെന്നാണ്‌ അദ്ദേഹം മറുപടി പറഞ്ഞത്‌.

ഏത്‌ കാലത്തും സര്‍ക്കാര്‍ തീരുമാനിക്കുന്ന കാര്യങ്ങള്‍ പാര്‍ട്ടി ചര്‍ച്ച ചെയ്‌ത്‌ തീരുമാനിക്കുകയാണ്‌ പതിവ്‌. ഇത്തരത്തില്‍ എല്ലാ പരിശോധനകളും സര്‍ക്കാര്‍ നടത്തുമെന്നും അദ്ദേഹം പറഞ്ഞു.