ബജറ്റില്‍ പുതിയ നികുതി നിര്‍ദ്ദേശങ്ങളില്ല

ദില്ലി: ധനകാര്യവകുപ്പന്റെ താല്‍കാലിക ചുമതലവഹിക്കുന്ന വിദേശകാര്യമന്ത്രി പ്രണബ്‌ മുഖര്‍ജി യുപിഎ സര്‍ക്കാറിന്റെ ആറാമത്തെ ബജറ്റ്‌ ലോക്‌സഭയില്‍ അവതരിപ്പിച്ചു.

സാമ്പത്തികമാന്ദ്യം രൂക്ഷമാണെന്ന്‌ വ്യക്തമാക്കിയെങ്കിലും അതിനെ നേരിടാന്‍ പ്രത്യേക പദ്ധതികളോ നിര്‍ദ്ദേശങ്ങളോ ഇടക്കാല ബജറ്റില്‍ ഇല്ല. പുതിയ നികുതി നിര്‍ദ്ദേശങ്ങളും ബജറ്റില്‍ ഉള്‍പ്പെടുത്തിയിട്ടില്ല.

കാര്‍ഷിക, ഗ്രാമീണ, വിദ്യാഭ്യാസ മേഖലകള്‍ക്ക്‌ ഊന്നല്‍ നല്‍കുന്നതാണ്‌ ബജറ്റ്‌. യുപിഎ സര്‍ക്കാറിന്റെ അഞ്ചുവര്‍ഷത്തെ ഭരണനേട്ടങ്ങള്‍ വിവരിക്കാനാണ്‌ പ്രണബ്‌ കൂടുതല്‍ സമയവും വിനിയോഗിച്ചത്‌.

ഏഴ്‌ മുതല്‍ എട്ടുശതമാനംവരെ സാമ്പത്തിക വളര്‍ച്ചയാണ്‌ ബജറ്റ്‌ ലക്ഷ്യമിടുന്നത്‌. എല്ലാവര്‍ക്കും ഗുണാത്മക വിദ്യാഭ്യാസം ഉറപ്പുവരുത്തല്‍, നിക്ഷേപത്തിലൂടെ തൊഴില്‍ അവസരം വര്‍ധിപ്പിക്കല്‍ തൊഴിലുറപ്പ്‌ പദ്ധതിയുടെ വ്യാപനം എന്നിവയും ബജറ്റ്‌ ലക്ഷ്യമിടുന്നു.

ആഗോള സാമ്പത്തിക രംഗം ആശാവഹമായ നിലയിലല്ലെങ്കിലും ലോകത്തിലെ ഏറ്റവും വളര്‍ച്ചയുള്ള രണ്ടാമത്തെ രാജ്യം ഇന്ത്യയാണെന്ന്‌ പ്രണബ്‌ പറഞ്ഞു.