മുംബൈ ആക്രമണം ആസൂത്രണം ചെയ്‌ത വീട്‌ കണ്ടെത്തി

ഇസ്ലാമബാദ്‌: മുംബൈ ആക്രമണം ആസൂത്രണം ചെയ്യാന്‍ ഭീകരര്‍ ഉപയോഗിച്ച വീട്‌ പാകിസ്‌താനില്‍ കണ്ടെത്തിയതായി ജിയോ ടിവി റിപ്പോര്‍ട്ട്‌ ചെയ്‌തു.

പാകിസ്‌താനിലെ സിന്ധ്‌ പ്രവിശ്യയിലാണ്‌ ഈ വീടെന്ന്‌ റിപ്പോര്‍ട്ടില്‍ പറയുന്നു. ആള്‍ താമസമില്ലാത്ത വീടിന്റെ ചിത്രങ്ങളും ചാനല്‍ പുറത്തുവിട്ടിട്ടുണ്ട്‌.

ഗുജറാത്ത്‌ തീരത്തുനിന്നും 160 കിലോമീറ്റര്‍ അകലെ മിര്‍പൂര്‍ സാക്രോയിലാണ്‌ വീട്‌ സ്ഥിതിചെയ്യുന്നത്‌. ഇവിടെനിന്നാണ്‌ ഭീകരര്‍ കറാച്ചി വഴി മൂന്നു ബോട്ടുകളിലായി ഇന്ത്യന്‍ തീരത്തെത്തിയത്‌.

മുംബൈ ആക്രമണം സംബന്ധിച്ചുള്ള വാര്‍ത്തകള്‍ വന്ന പത്രങ്ങളും വീട്ടില്‍ നിന്നും കണ്ടെടുത്തിട്ടുണ്ട്‌. ലോകത്തിന്റെ വിവിധ ഭാഗങ്ങളുടെ ഭൂപടങ്ങള്‍ വീടിന്റെ ചുവരുകളില്‍ പതിച്ചുവച്ചിട്ടുണ്ട്‌. ഇതില്‍ ചിലതില്‍ മുംബൈയുടെ സ്ഥാനം കൃത്യമായി അടയാളപ്പെടുത്തിയിട്ടുണ്ട്‌.

മുംതാസ്‌ എന്നൊരാളാണ്‌ വീട്‌ നോക്കിനടത്തുന്നതെന്ന്‌ റിപ്പോര്‍ട്ട്‌ സൂചിപ്പിക്കുന്നു. മുറിയിലെ റാക്കുകളില്‍ പുസ്‌തകങ്ങളും മറ്റൊരു മുറിയില്‍ മെത്തയും കട്ടിലും വീപ്പകളും സൂക്ഷിച്ചിട്ടുണ്ട്‌. ഒരു മുറിയില്‍ ലോക്കര്‍ സൗകര്യമുള്ളതായും ചിത്രങ്ങളില്‍ കാണുന്നു.