സാമ്പത്തിക രക്ഷാ പദ്ധതിയില്‍ ഒബാമ ഒപ്പുവച്ചു

വാഷിങ്‌ടണ്‍: അമേരിക്കയിലെ സാമ്പത്തിക പദ്ധതി പരിഹരിക്കുന്നതിനായുള്ള 787 ബില്യണ്‍ ഡോളറിന്റെ സാമ്പത്തിക രക്ഷാ പദ്ധതിയില്‍ പ്രസിഡന്റ്‌ ബരാക്‌ ഒബാമ ഒപ്പുവച്ചു.

ഇതോടെ രക്ഷാപദ്ധതി നടപ്പാക്കാന്‍ നിയമപരമായി അനുമതിയായി. 2010 നകം പ്രതിസന്ധി മറികടക്കാനുള്ള നികുതിയിളവും മറ്റു പദ്ധതികളും പാക്കേജില്‍ ഉള്‍പ്പെടുത്തിയിട്ടുണ്ട്‌.

കൊളറാഡൊയിലെ ഡെന്‍വറില്‍ നടന്ന ചടങ്ങില്‍ ഒട്ടേറെ സാമ്പത്തിക വിദഗ്‌ധരും സെനറ്റ്‌ മെമ്പര്‍ാമരും പങ്കെടുത്തു. നാല്‍പതുലക്ഷത്തോളം തൊഴിലവസരങ്ങള്‍ സൃഷ്ടിക്കാനുദ്ദേശിച്ചുള്ള അമേരിക്കന്‍ പുനരുജ്ജീവന പുനര്‍മൂലധന നിക്ഷേപപദ്ധതികളുടെ ഭാഗമായാണിതെന്ന്‌ ഒബാമ വ്യക്തമാക്കി.

രക്ഷാപദ്ധതി, ആരോഗ്യം, വിദ്യാഭ്യാസം, ഊര്‍ജ്ജം, ടൂറിസം ഭവനിര്‍മ്മാണമേഖല എന്നിവയെയാണ്‌ പ്രധാനമായും ലക്ഷ്യമിടുന്നത്‌. ബാങ്കുകളുടെ സാമ്പത്തിക പ്രതിസന്ധി പരിഹരിക്കാനുള്ള പദ്ധതികളും പാക്കേജിലുണ്ട്‌. രാജ്യത്ത്‌ ഉറച്ച സാമ്പത്തിക അടിത്തറയുണ്ടാക്കാനുള്ള ശ്രമങ്ങളുടെ ആദ്യ ചുവടുവയ്‌പാണിതെന്ന്‌ ഒബാമ പറഞ്ഞു.

എന്നാല്‍ പദ്ധതിയില്‍ ആവശ്യത്തിന്‌ നികുതിയിളവുകളില്ലെന്നും ഇത്‌ വരും വര്‍ഷങ്ങളില്‍ സാമ്പത്തിക രംഗത്ത്‌ കടംവരുത്തിവയ്‌ക്കാന്‍ കാരണമാകുമെന്നും റിപ്പബ്ലിക്കന്‍ വിഭാഗം പറഞ്ഞു. പ്രതിനിധി സഭയില്‍ ബില്ലിന്‌ റിപ്പബ്ലിക്കന്‍ വിഭാഗത്തിന്റെ പിന്തുണ ലഭിച്ചിരുന്നില്ല. സെനറ്റിലും മൂന്നു വോട്ടുകള്‍ മാത്രമാണ്‌ റിപ്പബ്ലിക്കന്‍ വിഭാഗത്തില്‍ നിന്നും പദ്ധതിയ്‌ക്ക്‌ ലഭിച്ചത്‌.