അംഗങ്ങളെ ശപിച്ചതില്‍ സോമനാഥിന്‌ ഖേദം

ദില്ലി: സഭയില്‍ ബഹളമുണ്ടാക്കിയ അംഗങ്ങളെല്ലാം തോറ്റുപോകട്ടെയെന്ന്‌ കഴിഞ്ഞ ദിവസം ശാപവാക്കുച്ചരിച്ചതില്‍ ലോക്‌സഭാ സ്‌പീക്കര്‍ സോമനാഥ്‌ ചാറ്റര്‍ജി ഖേദം രേഖപ്പെടുത്തി.

ബഹളം വയ്‌ക്കരുതെന്ന നിര്‍ദ്ദേശങ്ങള്‍ കേട്ടതായി ഭാവിക്കാതെ അംഗങ്ങള്‍ നിരന്തരം ബഹളം വച്ചിതിലുണ്ടായ നിരാശകൊണ്ടാണ്‌ താനത്‌ പറഞ്ഞുപോയതെന്ന്‌ വെള്ളിയാഴ്‌ച സ്‌പീക്കര്‍ വിശദീകരിച്ചു.

ഇന്നലെ നിരാശ സഹിക്കാന്‍ വയ്യാതെ ഞാന്‍ ചിലത്‌ പറഞ്ഞു. സഭയിലുള്ള നിങ്ങളെല്ലാവരും ജനങ്ങള്‍ പിന്തുണയ്‌ക്കുകയാണെങ്കില്‍ വീണ്ടും തിരഞ്ഞെടുക്കപ്പെടണമെന്നുതന്നെയാണ്‌ ഞാന്‍ ആഗ്രഹിക്കുന്നത്‌.

ഞാന്‍ മത്സരിക്കുന്നില്ലെന്നതുകൊണ്ട്‌ എന്നെ സംബന്ധിച്ചിടത്തോളം കാര്യങ്ങള്‍ എളുപ്പമാണ്‌. നിങ്ങളുടെ മനസ്സ്‌ വേദനിച്ചിട്ടുണ്ടെന്ന്‌ എനിക്കറിയാം നിങ്ങള്‍ക്കെല്ലാവര്‍ക്കും എന്റെ ശുഭാശംസകള്‍- അദ്ദേഹം പറഞ്ഞു.

അംഗങ്ങള്‍ കൂട്ടച്ചിരിയോടെയാണ്‌ അദ്ദേഹത്തിന്റെ ഖേദപ്രകടനത്തെ സ്വാഗതം ചെയ്‌തത്‌. വ്യാഴാഴ്‌ച ബിജെപി, ബിഎസ്‌പി, ടിഡിപി, പിഎംകെ, എംഡിഎംകെ, ആര്‍പിആ അംഗങ്ങള്‍ വിവിധ വിഷയങ്ങള്‍ ഉന്നയിച്ച്‌ ഒന്നിച്ച്‌ ബഹളം വച്ചപ്പോഴാണ്‌ നിങ്ങളെല്ലാവരും തിരഞ്ഞെടുപ്പില്‍ തോല്‍ക്കുകയാണ്‌ വേണ്ടതെന്ന്‌ സ്‌പീക്കര്‍ പറഞ്ഞത്‌.

അംഗങ്ങള്‍ക്കൊന്നും ഒരുതരത്തിലുള്ള ബത്തയും കിട്ടാന്‍ അര്‍ഹതയില്ലെന്നും സ്‌പീക്കര്‍ പറഞ്ഞിരുന്നു. സ്‌പീക്കറുടെ ഈ പരാമര്‍ശത്തെ പതിനേഴ്‌ വര്‍ഷത്തോളം രാജ്യസഭാ ഡപ്യൂട്ടി അധ്യക്ഷയായിരുന്നു നജ്‌മഹെപ്‌തുള്ള വിമര്‍ശിച്ചിരുന്നു. സ്‌പീക്കറുടെ ജോലി കളിനിയന്ത്രിക്കലാണെന്നും കളിക്കാരനാകാന്‍ ശ്രമിക്കരുതെന്നുമായിരുന്നു നജ്‌മയുടെ പ്രതികരണം.