പിണറായി ബനിയന്‍ വിപണിയില്‍

കൊല്ലം: സിപിഎം സംസ്ഥാന സെക്രട്ടറി പിണറായി വിജയന്റെ ചിത്രങ്ങള്‍ പതിച്ച ടീ ഷര്‍ട്ടുകള്‍ വില്‍പനയ്‌ക്ക്‌. കൊല്ലത്താണ്‌ പിണറായി ചിത്രങ്ങള്‍ പതിച്ച ബനിയന്‍ വില്‍പന പൊടിപൊടിക്കുന്നത്‌.

വഴിയോരങ്ങളിലാണ്‌ ബനിയന്‍ വില്‍പന നടക്കുന്നത്‌. ഒന്നിന്‌ 21 രൂപയാണ്‌ വില. ശനിയാഴ്‌ച ജില്ലയിലെത്തുന്ന നവകേരള മാര്‍ച്ചിന്റെ പശ്ചാത്തലത്തിലാണ്‌ പിണറായി ബനിയനുകള്‍ വിപണിയിലെത്തിയിരിക്കുന്നത്‌.

ഇതിഹാസ താരമായ പിണറായിയ്‌ക്ക്‌ അഭിവാദ്യങ്ങള്‍ എന്ന്‌ ബനിയനിലെ ചിത്രങ്ങള്‍ക്കൊപ്പം രേഖപ്പെടുത്തിയിട്ടുണ്ട്‌. ഒപ്പം സപ്പോര്‍ട്ട്‌ പിണറായി ബ്ലോഗ്‌ എന്നും എഴുതിയിട്ടുണ്ട്‌. യഥാര്‍ത്ഥത്തില്‍ അമ്പത്‌ രൂപയോളം വിലവരുന്ന ബനിയനുകള്‍ക്ക്‌ പിണറായി വരുന്നത്‌ പ്രമാണിച്ച്‌ വില കുറച്ചിരിക്കുകയാണത്രേ.

മൂന്ന്‌ അളവിലുള്ള ടി ഷര്‍ട്ടുകളാണ്‌ വിപണിയില്‍ എത്തിയിരിക്കുന്നത്‌. കുട്ടികളുടെ അളവിലുള്ള ഷര്‍ട്ടുകളും ലഭ്യമാണ്‌. ചെഗുവേരയെപ്പോലുള്ള നേതാക്കളുടെ ചിത്രങ്ങള്‍ പതിച്ച ബനിയനുകള്‍ ഇതിന്‌ മുമ്പേതന്നെ വിപണിയിലെത്തിയിട്ടുണ്ട്‌. എന്നാല്‍ കേരളത്തില്‍ നിന്നുള്ള ഒരു രാഷ്ട്രീയ നേതാവിന്റെ ചിത്രം പതിച്ച ബനിയനുകള്‍ വിപണിയിലെത്തുന്നത്‌ ഇതാദ്യമായിട്ടാണ്‌.