11കാരന് പിതാവിന്റെ ഗര്ഭിണിയായ കാമുകിയെ കൊന്നു
കഴിഞ്ഞ ക്രിസ്മസിന് സമ്മാനമായിക്കിട്ടിയ ചെറു തോക്കുകൊണ്ടാണ് പതിനൊന്നുകാരനായ ജോര്ദാന് ബ്രൗണ് അച്ഛന്റെ കാമുകിയായ ഇരുപത്തിയാറുകാരി കെന്സീ മരിയേ ഹൈകിനെ വെടിവച്ചുകൊന്നത്. ഫാം ഹൗസിലെ കിടപ്പുമുറിയില് ഇവര് ഉറക്കിക്കിടക്കുമ്പോഴാണ് ബ്രൗണ് കൊല നടത്തിയത്.
കെന്സിയുടെ തലയ്ക്ക് വെടിവച്ചശേഷം ബ്രൗണ് പതിവുപോലെ സ്കൂളിലേയ്ക്ക് പോവുകയായിരുന്നുവത്രേ. സ്കൂളിലേയ്ക്ക് പോകുമ്പോള് ഫാം ഹൗസിനടുത്ത് താന് കറുത്ത നിറത്തിലുള്ള ഒരു ട്രക്ക് കിടക്കുന്നത് കണ്ടിരുന്നുവെന്ന് പറഞ്ഞ് അന്വേഷണത്തെ വഴിതെറ്റിക്കാനുള്ള ബുദ്ധിയും ബ്രൗണ് കാണിച്ചുവെന്ന് പൊലീസ് പറയുന്നു.
കൊല്ലപ്പെട്ട കെന്സീ എട്ടു മാസം ഗര്ഭിണിയായിരുന്നുവത്രേ. ഓക്സിജന് കിട്ടാതെ ഗര്ഭസ്ഥശിശുവും മരിച്ചു. കെന്സിയും ബ്രൗണും നല്ലബന്ധത്തിലായിരുന്നില്ലെന്നും ഇവര് ഇടക്കിടെ വഴക്കിടാറുണ്ടായിരുന്നുവെന്നും ബ്രൗണിന്റെ സഹോദരീ ഭര്ത്താവ് പറഞ്ഞു.
സംഭവത്തെത്തുടര്ന്ന് ശനിയാഴ്ച രാവിലെ ബ്രൗണിനെ പൊലീസ് കസ്റ്റഡിയിലെടുത്തു. കൊലയ്ക്കുപയോഗിച്ച തോക്ക് ബ്രൗണിന്റെ മുറിയില് നിന്നും കണ്ടെടുത്തിട്ടുണ്ട്.
ബ്രൗണിന്റെ പ്രവൃത്തി തന്നില് നടുക്കമാണുണ്ടാക്കിയതെന്ന് പിതാവ് ക്രിസ് ബ്രൗണ് പറഞ്ഞു. അദ്ദേഹമാണ് ബ്രൗണിന് കളിക്കാനായി ക്രിസ്മസിന് ഒരു കൊച്ചു തോക്ക് വാങ്ങിക്കൊടുത്തത്.
അമേരിക്കയില് നാലു മാസത്തിനുള്ളില് ഇത് രണ്ടാം തവണയാണ് കൊച്ചു കുട്ടി കൊലക്കേസ് പ്രതിയാകുന്നത്. 2008 നവംബറില് അരിസോണയില് ഒരു എട്ടുവയസ്സുകാരന് അച്ഛനെയും അമ്മയെയും വെടിവച്ചുകൊന്നിരുന്നു.