എസ്എംഇ പീഡനക്കേസ് 3 പ്രതികള് കുറ്റക്കാര്
കോട്ടയം: എസ്എംഇ റാഗിംഗ് കേസില് ഒന്ന് മുതല് മൂന്ന് വരെ പ്രതികള് കുറ്റക്കാരാണെന്ന് കോട്ടയം പ്രത്യേക കോടതി ജഡ്ജി കെ. ശശിധരന് നായര് വിധിച്ചു.
നാല് മുതല് ഒമ്പത് വരെയുള്ള പ്രതികളെ കോടതി വെറുതെ വിട്ടു. ഒന്നും രണ്ടും മൂന്നും പ്രതികളായ രഞ്ജിത് വര്ഗീസ്, ഷെറിന്, ഷഫീക് യൂസഫ് എന്നീ പ്രതികള്ക്കുള്ള ശിക്ഷ കോടതി വ്യാഴാഴ്ച വിധിയ്ക്കും. വെറുതെ വിട്ടവരില് സ്ഥാപന മേധാവികളും ഉള്പ്പെടുന്നു.
എംജി സര്വകലാശാലയുടെ കോട്ടയം ഗാന്ധി നഗര് സ്കൂള് ഓഫ് മെഡിക്കല് എഡ്യൂക്കേഷനിലെ ഒന്നാം വര്ഷ നഴ്സിംഗ് വിദ്യാര്ത്ഥിനിയെ മുതിര്ന്ന വിദ്യാര്ത്ഥികള് റാഗിംഗിന്റെ മറവില് ലാബിനുള്ളില് വച്ച് പീഡിപ്പിച്ചുവെന്നാണ് കേസ്.
2005 ഒക്ടോബര് 21നാണ് കേസിനാസ്പദമായ സംഭവം. കേസില് ആറ് വിദ്യാര്ത്ഥികളെ കൂടാതെ എസ്എംഇ പ്രിന്സിപ്പല്, ഡയറക്ടര്, കോട്ടയം മനോരോഗ വിഭാഗം മേധാവി എന്നിവരും പ്രതികളായിരുന്നു. സംഭവം മറച്ചുവെയ്ക്കാന് ശ്രമിച്ചുവെന്നാണ് സ്ഥാപന മേധാവികള്ക്കെതിരായ കേസ്.
കേസില് പല തവണ സുപ്രീം കോടതി ഇടപെട്ടത് വന്വാര്ത്താ പ്രധാന്യം നേടിയിരുന്നു. പ്രതികള്ക്കൊപ്പം വാദിയായ പെണ്കുട്ടിയെ നുണ പരിശോധനയ്ക്ക് വിധേയയാക്കാന് ഹൈക്കോടതി ഉത്തരവിട്ടെങ്കിലും സുപ്രീം കോടതി ഈ ഉത്തരവ് റദ്ദാക്കി. വിദ്യാര്ത്ഥികളുടെ സസ്പെന്ഷന് റദ്ദാക്കിയ ഹൈക്കോടതിയുടെ നടപടിയും സുപ്രീം കോടതി ഇടപെട്ട് തടഞ്ഞു.