അക്രമികളെ അടിച്ചുവീഴ്‌ത്തി യുവതി രക്ഷപ്പെട്ടു

കുവൈത്ത്‌ സിറ്റി: ബംഗ്ലാദേശുകാരനായ ടാക്‌സി ഡ്രൈവര്‍ തട്ടിക്കൊണ്ടുപോയി തടവിലിട്ട്‌ പീഡിപ്പിക്കാന്‍ ശ്രമിച്ച ഫിലിപ്പീന്‍ യുവതി അക്രമികളെ കീഴ്‌പ്പെടുത്തി രക്ഷപ്പെട്ടു.

ഫിലിപ്പീന്‍ എംബസിയിലെത്തിയ യുവതി അംബാസഡര്‍ റികാര്‍ഡോവിന്‌ പരാതി നല്‍കി. ജോലിയ്‌ക്ക്‌ നിന്നിരുന്ന വീട്ടില്‍ നിന്നും ഏഴ്‌ മാസത്തോളമായി ശംബളം ലഭിക്കാത്തതിനെത്തുടര്‍ന്ന്‌ യുവതി അവിടെനിന്നും പുറത്തുചാടുകയായിരുന്നു.

ഫിലിപ്പീന്‍ എംബസിയിലേയ്‌ക്ക്‌ പോകാനായാണ്‌ ബംഗ്ലാദേശുകാരന്റെ ടാക്‌സിയില്‍ കയറിയത്‌. എന്നാല്‍ സഹായിക്കാനെന്ന വ്യാജേന ഇയാള്‍ യുവതിയെ ഒരു ഫ്‌ളാറ്റില്‍ കൊണ്ടുപോയി പൂട്ടിയിട്ടു. അവിടെവച്ച്‌ ഇയാളും സുഹൃത്തുക്കളും ചേര്‍ന്ന്‌ ഇവരെ പീഡിപ്പിക്കാന്‍ ശ്രമിച്ചു.

ആയോധനകല അറിയാമായിരുന്ന യുവതി എല്ലാവരെയും അടിച്ചുവീഴ്‌ത്തി രക്ഷപ്പെടുകയായിരുന്നു. സംഭവത്തിന്‌ ശേഷം ഒരു ഫിലിപ്പീന്‍ കുടുംബമാണ്‌ യുവതിയ്‌ക്ക്‌ അഭയം നല്‍കിയത്‌.

യുവതിയെ കാണാതായത്‌ സംബന്ധിച്ച്‌ നാട്ടിലെ ബന്ധുക്കള്‍ നല്‍കിയ വാര്‍ത്ത ഫിലിപ്പീന്‍ ടിവി ചാനലില്‍ വന്നതിനെത്തുടര്‍ന്നാണ്‌ യുവതിയ്‌ക്ക്‌ അഭയം നല്‍കിയ കുടുംബം അവരെ ഫിലിപ്പീന്‍ എംബസിയില്‍ എത്തിച്ചത്‌.

സ്‌പോണ്‍സറുമായി ചര്‍ച്ച നടത്തി നല്‍കാനുള്ള ശംബളം ലഭ്യമാക്കാനും പീഡനത്തിന്‌ ശ്രമിച്ചവര്‍ക്കെതിരെ കേസ്‌ നല്‍കുന്നതിനുള്ള നടപടികള്‍ സ്വീകരിച്ചിട്ടുണ്ടെന്ന്‌ എംബസി അധികൃതര്‍ പറഞ്ഞു.