എടിഎസിന്‌ തലവേദനയായി സാദിഖിന്റെ കുറ്റസമ്മതം

മുംബൈ: 2006 ജൂലൈ 11ന്‌ തീവണ്ടി സ്‌ഫോടന പരമ്പരയില്‍ തനിക്കും പങ്കുണ്ടെന്ന ഇന്ത്യന്‍ മുജാഹിദീന്‍ പ്രവര്‍ത്തകന്‍ സാദിഖ്‌ ഷെയ്‌ഖിന്റെ കുറ്റസമ്മതം മഹാരാഷ്ട്ര ഭീകരവിരുദ്ധ സ്‌ക്വാഡിന്‌(എടിഎസ്‌0 തലവേദനയാകുന്നു.

രണ്ട്‌ വര്‍ഷം മുമ്പ്‌ 13 പ്രതികളെ ഉള്‍പ്പെടുത്തി എടിഎസ്‌ ഫയല്‍ ചെയ്‌ത കുറ്റപത്രത്തില്‍ സാദിക്കിനും മറ്റ്‌ ഇന്ത്യന്‍ മുജാഹിദീന്‍ പ്രവര്‍ത്തകര്‍ക്കും ഗൂഡാലോചനയില്‍ പങ്കില്ലെന്നാണ്‌ പറയുന്നത്‌. ഒരു വാര്‍ത്താ ചാനലാണ്‌ സാദിഖിന്റെ കുറ്റസമ്മതം വെള്ളിയാഴ്‌ച പുറത്തുവിട്ടത്‌.

പ്രഷര്‍ കുക്കറിനുള്ളില്‍ ബോംബ്‌ നിറച്ച്‌ തീവണ്ടിയില്‍ വച്ചത്‌ താനും കൂട്ടാളികളുമാണെന്ന്‌ സാദിഖ്‌ ഏറ്റു പറയുന്നു. എന്നാല്‍ ഈ വെളിപ്പെടുത്തല്‍ അസംബന്ധമാണെന്നും അന്വേഷണത്തെ വഴിതെറ്റിക്കാനാണ്‌ ഇത്തരത്തിലൊരു കുറ്റസമ്മതം നടത്തിയതെന്നും എടിഎസ്‌ പ്രതികരിച്ചു.

സാദിഖിനെ ചോദ്യം ചെയ്‌തിരുന്നുവെന്നും ഈ സാഹചര്യത്തില്‍ അതുസംബന്ധിച്ച കാര്യങ്ങള്‍ വെളിപ്പെടുത്താന്‍ കഴിയില്ലെന്നും എടിഎസ്‌ തലവന്‍ രഘുവാംശി പറഞ്ഞു. ഇദ്ദേഹത്തിനായിരുന്നു സ്‌ഫോടന കേസിന്റെ അന്വേഷണ ചുമതല. പാകിസ്‌താന്‍ കേന്ദ്രമാക്കി പ്രവര്‍ത്തിക്കുന്ന സിമി പ്രവര്‍ത്തകരാണ്‌ സ്‌ഫോടനത്തിന്‌ പിന്നിലെന്നും അദ്ദേഹം വ്യക്തമാക്കി.

തീവണ്ടി സ്‌ഫോടനത്തില്‍തനിക്ക്‌ പങ്കുണ്ടെന്ന്‌ സാദിഖ്‌ മുംബൈ ക്രൈംബ്രാഞ്ചിനോടും സമ്മതിച്ചിരുന്നു. 2008ല്‍ അഹമ്മദാബാദില്‍ ഉണ്ടായ സ്‌ഫോടനത്തിന്‌ ഉപയോഗിച്ച കാറുകള്‍ മോഷ്ടിച്ച കേസിലാണ്‌ ഇയാളെ ക്രൈംബ്രാഞ്ച്‌ അറസ്‌റ്റുചെയ്‌തത്‌.