പ്രജാരാജ്യത്തിന് പ്രത്യേക ചിഹ്നം ലഭിക്കില്ല
ദില്ലി തെലുങ്ക് തിരഞ്ഞെടുപ്പ് രാഷ്ട്രീയത്തില് കരുത്ത് തെളിയിക്കാനൊരുങ്ങുന്ന സൂപ്പര് സ്റ്റാര് ചിരഞ്ജീവിയുടെ പ്രജാരാജ്യത്തിന് തുടക്കത്തിലേ തിരിച്ചടി.
പ്രജാരാജ്യം പാര്ട്ടിക്ക് ലോക്സഭാ തിരഞ്ഞെടുപ്പില് പാര്ട്ടി ചിഹ്നം അനുവദിക്കാന് കഴിയില്ലെന്ന് തിരഞ്ഞെടുപ്പ് കമ്മീഷന് വ്യക്തമാക്കി. നിശ്ചിത ശതമാനം വോട്ടുകള് നേടി അംഗീകാരം ലഭിച്ചാല് മാത്രമേ പൊതുചിഹ്നം അനുവദിക്കുകയുള്ളൂവെന്നും എന്ന് കമ്മീഷന് അറിയിച്ചു.
അംഗീകാരമുള്ള രാഷ്ട്രീയ കക്ഷികള്ക്ക് മാത്രമേ ഇന്ത്യയില് പാര്ട്ടി ചിഹ്നം നല്കൂ. പ്രജാരാജ്യം അഭിമുഖീകരിക്കുന്ന ആദ്യ പൊതുതിരഞ്ഞെടുപ്പാണിത്. നിശ്ചിത ശതമാനം വോട്ടുകള് നേടിയെങ്കില് മാത്രമേ അംഗീകാരം നല്കാനാകൂ എന്നും കമ്മീഷന് വ്യക്തമാക്കി.
തിരഞ്ഞെടുപ്പ് കമ്മീഷന്റെ പ്രഖ്യാപനത്തോടെ പ്രജാരാജ്യത്തിന്റെ സ്ഥാനാര്ത്ഥികള് സ്വതന്ത്ര സ്ഥാനാര്ത്ഥികള്ക്കുള്ള ചിഹ്നങ്ങളില് തിരഞ്ഞെടുക്കേണ്ടതായി വരും.
ലക്ഷക്കണക്കിന് അനുയായികളെ സാക്ഷി നിര്ത്തി കഴിഞ്ഞ ഓഗസ്റ്റിലാണ് ചിരഞ്ജീവി പ്രജാരാജ്യം രൂപീകരിച്ചത്. പാര്ട്ടിയുടെ ചിഹ്നമായി തീവണ്ടി എഞ്ചിനും അദ്ദേഹം പ്രഖ്യാപിച്ചിരുന്നു. ഈ സാഹചര്യത്തിലാണ് തിരഞ്ഞെടുപ്പ് കമ്മീഷന് വിശദീകരണം നല്കിയത്.