കൂലംകുത്തികള്ക്കെതിരെ വീണ്ടും പിണറായി
ഒഞ്ചിയം സമരസേനാനി മണ്ടോടി കണ്ണന്റെ അറുപതാം രക്ഷസാക്ഷി വാര്ഷികദിനാചരണച്ചടങ്ങില് സംസാരിക്കുകയായിരുന്നു പിണറായി. നേരത്തേ പുറത്തുനിന്നും പാര്ട്ടിയെ തകര്ക്കാനുള്ള ശ്രമം പരാജയപ്പെട്ടപ്പോഴാണ് ഉള്ളില് നിന്നും തകര്ക്കാന് ശ്രമം തുടങ്ങിയത്.
അതിവിപ്ലവമൊക്കെ പരാജയപ്പെട്ടത് നമ്മള് കണ്ടതാണ്. അതുപോലെയാണ് ഒഞ്ചിയത്ത് പാര്ട്ടിയില് നിന്നും പുറത്തുപോയവരുടെ പ്രവര്ത്തനം. ഇതില് കുറച്ചുപേര് മാത്രമാണ് പാര്ട്ടിയെ തകര്ക്കാന് ശ്രമിക്കുന്നത്. ബാക്കിയുള്ളവര് വഴിതെറ്റിപ്പോയവരാണ്. ഇവര്ക്ക് വേണ്ടി പാര്ട്ടിയുടെ വാതിലുകള് തുറന്നിട്ടിരിക്കുന്നു. പുറത്തുപോയവരോട് പിണക്കമില്ല- പിണറായി പറഞ്ഞു.
എന്നാല് കൂലം കുത്തികള് വര്ഗവഞ്ചകര് തന്നെയാണെന്ന് അദ്ദേഹം പറഞ്ഞു. തെരഞ്ഞെടുപ്പ് പ്രഖ്യാപനത്തിന് ശേഷമുള്ള പിണറായിയുടെ ആദ്യ പരിപാടിയാണ് ഒഞ്ചിയത്ത് നടന്നത്. പരിപാടിയില് സദസ്സ് നന്നേ ശുഷ്കമായിരുന്നു.
എന്നാല് ഒരു കിലോമീറ്റര് അകലെ സിപിഎം വിമതഗ്രൂപ്പായ മാര്ക്സിസ്റ്റ് പാര്ട്ടി നടത്തിയ സമാന്തര ദിനാചരണത്തില് ഇരട്ടിപ്പേര് പങ്കെടുത്തത് സിപിഎമ്മിന് തിരിച്ചടിയായി.
പാര്ട്ടി സംസ്ഥാന സെക്രട്ടറി പങ്കെടുത്ത ചടങ്ങ് ശുഷ്കമാവുകയും വിമതര്ക്ക് കൂടുതല് ജനപിന്തുണ ലഭിക്കുകയും ചെയ്തത് പ്രാദേശിക നേതൃത്വത്തെ തലവേദനയിലാക്കിയിട്ടുണ്ട്. തിരഞ്ഞെടുപ്പ് അടുത്ത സാഹചര്യത്തില് ഒഞ്ചിയം പോലുള്ള ചുവപ്പു കോട്ടകളില് വിള്ളല് വീഴുന്നത് നേതൃത്വത്തെ ആശങ്കയിലാഴ്ത്തുന്നുണ്ട്.