കോണ്‍ഗ്രസ് സീറ്റില്‍ നോട്ടമിട്ട് നഗ്മ

ദില്ലി: താരറാണിമാരില്‍ നിന്ന് ഒരാള്‍ കൂടി രാഷ്‌ട്രീയത്തിലേക്ക്‌.തെന്നിന്ത്യയുടെ ഗ്ലാമര്‍ താരമായി വിലസുകയും പിന്നീട് സുവിശേഷ പ്രസംഗകയുമായി മാറിയ നഗ്മയാണ് കോണ്‍ഗ്രസ്‌ സ്‌ഥാനാര്‍ഥിയായി മത്സരിക്കാന്‍ താല്‍പര്യം പ്രകടിപ്പിച്ച്‌ രംഗത്തെത്തിയിരിക്കുന്നത്‌.

ബോളിവുഡ് താരം ഗോവിന്ദ എംപിയായ മുംബൈ നോര്‍ത്ത് വെസ്റ്റില്‍ നിന്നും മത്സരിക്കാന്‍ തയാറാണെന്ന് അറിയിച്ചു കൊണ്ട് നഗ്മ തന്നെ കണ്ടതായി മുതിര്‍ന്ന കോണ്‍ഗ്രസ്‌ നേതാവും കര്‍ണാടക മുന്‍മന്ത്രിയും കോണ്‍ഗ്രസ്‌ സ്‌ക്രീനിംഗ്‌ കമ്മിറ്റിയംഗവുമായ മല്ലികാര്‍ജുന്‍ ഖാര്‍ഗെ വെളിപ്പെടുത്തി.

ഹിന്ദി സിനിമയില്‍ വലിയ ഹിറ്റുകളൊന്നുമില്ലെങ്കിലും ഭോജ്പൂരി ചിത്രങ്ങളിലൂടെ ഉത്തരേന്ത്യന്‍ ഹൃദയം കീഴടക്കാന്‍ നഗ്മയ്കക്ക് കഴിഞ്ഞിട്ടുണ്ട്.

അതേ സമയം മുംബൈ നോര്‍ത്ത് വെസ്റ്റില്‍ എംപിയായ ഗോവിന്ദയുടെ പ്രവര്‍ത്തന പരാജയം കണക്കിലെടുത്ത് വീണ്ടുമൊരു പരീക്ഷണത്തിന് ഇവിടെ കോണ്‍ഗ്രസ് മുതിരില്ലെന്നാണ് കരുതപ്പെടുന്നത്. എംപിയായതിന് ശേഷം ഗോവിന്ദ മണ്ഡലത്തിലെ അവഗണിച്ചത് കോണ്‍ഗ്രസിന് നാണക്കേടുണ്ടാക്കിയിരുന്നു.

അതേസമയം, ഫത്തേപുര്‍ സിക്രിയില്‍ സിനിമാതാരം രാജ്‌ബബ്ബറിനെ മത്സരിപ്പിക്കാന്‍ കോണ്‍ഗ്രസ്‌ തീരുമാനിച്ചിട്ടുണ്ട്.