പൂതൃക്കയിലിന്റെ ഹര്ജി സിബിഐയുടെ വിശദീകരണം തേടി
കൊച്ചി: ജാമ്യവ്യവസ്ഥയില് ഇളവുതേടി അഭയ കേസിലെ രണ്ടാം പ്രതി ഫാദര് ജോസ് പൂതൃക്കയില് സമര്പ്പിച്ച ഹര്ജിയില് കോടതി സിബിഐയുടെ വിശദീകരണം തേടി.
ഇക്കാര്യത്തില് സിബിഐയുടെ നിലപാട് അറിഞ്ഞശേഷം വെള്ളിയാഴ്ച വാദം കേള്ക്കുമെന്നാണ് ജസ്റ്റിസ് രാംകുമാര് വ്യാഴാഴ്ച അറിയിച്ചത്.
കോടതിയുടെ മുന്കൂര് അനുമതിയോടെ മാത്രമേ താമസസ്ഥലം വിട്ടുപോകാവൂ എന്നും, ഫോണ് ചെയ്യരുതെന്നും ജാമ്യവ്യവസ്ഥയില് പറഞ്ഞിട്ടുണ്ട്. താമസസ്ഥലം വിട്ടുപോകാന് കോടതിയുടെ അനുമതി വേണമെന്ന വ്യവസ്ഥയില് ഇളവ് വേണമെന്നാണ് പൂതൃക്കയിലിന്റെ ആവശ്യം. ഫോണ്ചെയ്യരുതെന്ന വ്യവസ്ഥയിലും അദ്ദേഹം ഇളവ് ആവശ്യപ്പെട്ടിട്ടുണ്ട്.
പള്ളിയിലെ മുഖ്യപുരോഹിതന് എന്ന നിലയിലും കോളെജിലെ ചുമതലകള് വഹിക്കാനും ഈ വ്യവസ്ഥകള് തടസ്സമാകുന്നുവെന്നാണ് ഹര്ജിയില് പറഞ്ഞിരിക്കുന്നത്.
കേസിലെ ഒന്നാം പ്രതി ഫാദര് തോമസ് കോട്ടൂരും, മൂന്നാം പ്രതി സിസ്റ്റര് സെഫിയും ജാമ്യവ്യവസ്ഥയില് ഇളവ് തേടി കോടതിയെ സമീപിച്ചിട്ടുണ്ട്. ഇവരുടെ ഹര്ജികളും വരുംദിവസങ്ങളില് കോടതി പരിഗണിയ്ക്കും.