ഇടുക്കിയില്‍ ഫ്രാന്‍സിസ് ജോര്‍ജ്ജ്

കോട്ടയം: ഇടുക്കി ലോക്‌സഭാ സീറ്റില്‍ എല്‍ഡിഎഫ് സ്ഥാനാര്‍ഥിയായി കേരളാ കോണ്‍ഗ്രസ്(ജെ)യിലെ കെ ഫ്രാന്‍സിസ് ജോര്‍ജ് മത്സരിക്കും. വെള്ളിയാഴ്ച ചേര്‍ന്ന കേരളാകോണ്‍ഗ്രസ്(ജെ) സെക്രട്ടറിയേറ്റാണ് ഇക്കാര്യം തീരുമാനിച്ചത്. ഇടുക്കിയിലെ സിറ്റിംഗ് എംപിയാണ് ഫ്രാന്‍സിസ് ജോര്‍ജ്ജ്.

അതേ സമയം ഇത്തവണ പാര്‍ലമെന്റ് തിരഞ്ഞെടുപ്പില്‍ താന്‍ മത്സരരംഗത്തുണ്ടാകില്ലെന്ന് പിസി തോമസ് അറിയിച്ചു. കോട്ടയവും ഇടുക്കിയും ഉള്‍പ്പെടെയുള്ള സീറ്റുകളില്‍ ഇടത് മുന്നണി സ്ഥാനാര്‍ത്ഥികളുടെ വിജയത്തിനായി പ്രവര്‍ത്തിയ്ക്കുമെന്നും അദ്ദേഹം വ്യക്തമാക്കി.

എന്നാല്‍ ഇടുക്കി മണ്ഡലത്തിലെ സ്ഥാനാര്‍ത്ഥിയെ തീരുമാനിയ്ക്കുന്നതിന് കോട്ടയത്ത് ചേര്‍ന്ന പാര്‍ട്ടി സെക്രട്ടേറിയറ്റ് യോഗത്തില്‍ നിന്ന് പിസി തോമസ്, വൈസ് ചെയര്‍മാന്‍ സുരേന്ദ്രന്‍ പിള്ള എംഎല്‍എ, ജനറല്‍ സെക്രട്ടറിമാരായ സ്കറിയാ തോമസ്, ജോസ് സെബാസ്റ്റ്യന്‍ എന്നിവര്‍ വിട്ടുനിന്നത് ശ്രദ്ധേയമായി.

മറ്റ് പരിപാടികളില്‍ പങ്കെടുക്കാനുള്ളതിനാല്‍ യോഗത്തിന് എത്തുകയില്ലെന്ന് ഇവര്‍ നേരത്തെ അറിയിച്ചിരുന്നതായി പാര്‍ട്ടി ചെയര്‍മാന്‍ പിജെ ജോസഫ് പറഞ്ഞു.