അമേരിക്കയില്‍ തൊഴിലില്ലായ്‌മ അതി രൂക്ഷം

വാഷിങ്‌ടണ്‍: സാമ്പത്തിക മാന്ദ്യം അമേരിക്കയിലെ ജനജീവിതത്തെ അനുദിനം വഷളാക്കിക്കൊണ്ടിരിക്കുന്നു. ഇപ്പോള്‍ അമേരിക്കയിലെ തൊഴിലില്ലായ്‌മാ നിരക്ക്‌ കഴിഞ്ഞ 25 വര്‍ഷത്തില്‍ ഏറ്റവും കൂടിയ തോതാണെന്ന്‌ തൊഴില്‍ വകുപ്പിന്റെ റിപ്പോര്‍ട്ട്‌.

7.6 ശതമാനമായിരുന്ന തൊഴിലില്ലായ്‌മ ഇപ്പോള്‍ 8.1 ശതമാനമായി വര്‍ധിച്ചിരിക്കുകയാണ്‌. ഫെബ്രുവരിയില്‍ മാത്രം ഇവിടെ 6,51,000 പേര്‍ക്ക്‌ തൊഴില്‍ നഷ്ടപ്പെട്ടതായി റിപ്പോര്‍ട്ടില്‍ പറയുന്നു. 19983ന്‌ ശേഷമുള്ള ഏറ്റവും രൂക്ഷമായ തൊഴിലല്ലായ്‌മയാണ്‌ രാജ്യം നേരിടുന്നത്‌.

മാന്ദ്യം മൂലം ഇതുവരെ 44 ലക്ഷം പേര്‍ക്കാണ്‌ തൊഴിലില്ലതായത്‌. കഴിഞ്ഞ ഡിസംബറില്‍ 6,81000 പേര്‍ക്കും, 2009 ജനുവരില്‍ 6,55,000 പേര്‍ക്കുമാണ്‌ തൊഴില്‍ നഷ്ടപ്പെട്ടത്‌.

കഴിഞ്ഞ ഡിസംബറോടെയാണ്‌ സാമ്പത്തിക മാന്ദ്യം അമേരിക്കയെ ഏറ്റവും രൂക്ഷമായി ബാധിച്ചുതുടങ്ങിയത്‌. 2010 പിറന്നാലും ആദ്യ മാസങ്ങളിലൊന്നും ഈ സ്ഥിതിയ്‌ക്ക്‌ കാര്യമായ പുരോഗതിയുണ്ടാകാന്‍ സാധ്യതിയില്ലെന്ന്‌ അമേരിക്കന്‍ ഫെഡറല്‍ റിസര്‍വ്‌ പറയുന്നു.